“Zirə” və “Qəbələ” arasında inciklik - ÖZƏL

Azərbaycan Premyer Liqasının iki klubu - “Zirə” və “Qəbələ” arasında inciklik yaranıb.

Futbolxeber.az saytının əldə etdiyi məlumata görə, bir müddət əvvəl 2 klubun rəhbəri - Orxan Məmmədov və Fariz Nəcəfov arasında centlmensayağı razılaşma olub.

Belə ki, hələ ötən mövsüm başa çatmamış “Zirə” “Qəbələ”nin bir neçə futbolçusuna “elçi düşmüşdü”. Həmin vaxt Azərbaycan Premyer Liqasında bu 2 klub üçün həlledici məqam idi. Bir tərəfdən ölkə kubokunda finalçılar müəyyənləşmişdisə, digər tərəfdən də çempionatda dördüncü yeri taleyi həll olunurdu. “Zirə” və “Qəbələ” arasında avrokuboklara vəsiqə verən dördüncü yer uğrunda gərgin mübarizə getdiyi bir vaxtda bu cür transfer xəbərlərinin yayılması “Qəbələ” cameəsində heç də yaxşı qarşılanmamışdı. Yekunda Orxan Məmmədov və Fariz Nəcəfov arasında söhbət olub və tərəflər razılığa gəliblər ki, “Zirə” “Qəbələ”nin maddi durumunun zəif olmasından faydalanmayacaq, paytaxt klubu əks düşərgədən heç bir futbolçunu heyətinə qatmayacaq.

Lakin mövsüm başa çatdıqdan sonra qeyri-rəsmi razılaşma pozulub. Məlumdu ki, paytaxt təmsilçisi son mövsüm “Qəbələ”də çıxış etmiş Məqsəd İsayev və Ruan Renatonu heyətinə qatıb. Bu isə “Qəbələ” tərəfindən narazılıqla qarşılanıb. “Zirə”nin centlmensayağı razılaşmanı pozması klub prezidenti Fariz Nəcəfovun incikliyinə səbəb olub.

Qeyd edək ki, “Zirə” “Qəbələ”nin daha 2 futbolçusu - Rafael Utziq və İsnik Alimini də heyətində görmək istəyib. Lakin əcnəbilər karyeralarını Azərbaycandan kənarda davam etdirəcəklər. Utqiz Cənubi Koreyaya, Alimi isə Rumıniyaya üz tutub.

FUTBOLXEBER.AZ