Azər Bağırov: “Təcrübəli legionerlərlə güclənmək istəyirik ki...”

“Hal-hazırda hazırlığın birinci mərhələsindəyik. Tezliklə bizə qoşulacaq yerli futbolçular var. Onlarla danışıqlar yekunlaşmaq üzrədi”.

Futbolxeber.az saytına müsahibəsində bu sözləri “Araz Naxçıvan”ın baş məşqçisi Azər Bağırov deyib.

O, Naxçıvan təmsilçisinin Türkiyəyə təlim-məşq toplanışına yollana biləcəyini istisna etməyib: “Əlbəttə ki, heyətimizə legionerlər də qoşulacaq. Onların düşərgəyə gəlmələri bir neçə gün vaxt aparır. İlk həftəmizdə transfer çalışmalarını böyük ölçüdə bitirmək istəyirik. Çünki artıq qarşıdakı günlərdə yoxlama oyunlarımız olacaq. Çalışacağıq ki, xətlərarası əlaqəni, anlaşma səviyyəsini daha da yüksəldək. Futbolçulardan nə istədiyimizi onlara anlada bilək. Legionerlərin gəlməsini çatdıra bilsək, hazırlıq üçün Ərzuruma yollanacağıq. Orada 3 yoxlama oyunu keçirməyi planlaşdırırıq”.

Bağırov komandasının bütün xətləri gücləndirməli olduğunu söyləyib: “Bütün xətlər üzrə yeni futbolçulara ehtiyacımız var. Hazırda sərəncamımızda olanların əksəri cavanlardı. Təcrübəli legionerlərlə güclənmək istəyirik ki, onlar gənclərə də dəstək olsunlar. Artıq Bosniya və Hersoqovina çempionatından Semir Bukiç bir neçə gündür komandamıza qoşulub. Yaxşı qapıçıdı. İnanıram ki, faydasını görəcəyik”.

Mütəxəssis komandanın sponsorunu itirməsi haqda sualı belə cavablandırıb: “Sponsor məsələsinin məşqçilər korpusuna aidiyyəti yoxdu. Hazırda Premyer Liqada çıxış üçün lazım olan işimizi görürük. Stadion, infrastruktur - bütün bunlar klub rəhbərliyinə aid mövzulardı. Hər kəs öz sahəsinə cavabdehdi. Əsas odur ki, “Araz Naxçıvan” yenidən Premyer Liqadadı və öz yolumuza davam edəcəyik”.

A.Bağırov Naxçıvan təmsilçisinin hədəflərindən də söz açıb: “Araz Naxçıvan”ın əsas hədəfi yaxşı futbol sərgiləməkdir. Təbii ki, gələcəkdə daha yaxşı kollektiv formalaşdıra bilsək, iddialarımız da böyüyəcək. İndiki məqamda isə pillə-pillə inkişaf etməyi hədəfləyirik”.

Fərəc ASLANOV