Vurğun Hüseynov: “Kəpəz”in əsas məqsədi mübariz komanda formalaşdırmaqdı”

“Ayın 26-dan hazırlığın birinci mərhələsinə başlamışıq. Artıq “Səbail”lə yoxlama oyunumuz da olub. Deyərdim ki, komandada hər şey normaldı. Təbii ki, ilk gündən əsasən fiziki hazırlığa önəm verilirdi. Biz də əlimizdən gələni edirik ki, çempionatın startına qədər 100 faiz də olmasa, 60-70 faiz hazır olaq”.

Futbolxeber.az saytına müsahibəsində bu sözləri “Kəpəz”in üzvü Vurğun Hüseynov deyib.

Təcrübəli futbolçu qeyd edib ki, çempionatın startında hazırlıq baxımından “Kəpəz”də işlər qaydasında olacaq: “Hazırda heyətdə cavan futbolçular çoxdu. Yeni transferlər komandaya tam qoşulmayıblar. Gənclər də əllərindən gələni edirlər ki, əsas heyətdə məhkəmlənsinlər. Mən də təcrübəli futbolçu kimi onlara kömək olmağa çalışıram. Düşünürəm ki, çempionatın startında yaxşı “Kəpəz” görəcəksiniz. Baş məşqçi Azər Məmmədov da, mən özüm də komandaya yeni qoşulmuşuq. Əsas məqsədimiz “Kəpəz”in adına layiq mübariz komanda formalaşdırmaqdı”.

Vurğun Hüseynov ötən mövsüm yekunlaşdıqdan sonra karyerasını bitirdiyini açıqlamışdı. Lakin sonradan 35 yaşlı müdafiəçi fikrini dəyişdi. O, qərarının səbəbini belə izah etdi: “Bəli, karyeramı bitirdiyimi açıqlamışdım. Amma onu da demişdim ki, hansısa məşqçi məni yanında görmək istəsə, futbola qayıda bilərəm. Sağ olsun, Azər müəllim “Kəpəz”in baş məşqçisi təyin edildikdən sonra məni yanına dəvət etdi. Mən də dəvəti qəbul etdim və komandaya faydalı olmaq üçün əlimdən gələni edəcəyəm”.

“Kəpəz”in yeni transferi “Bu, karyeranızda sonuncu mövsüm olacaq?” sualını belə cavablandırıb: “Bu mövsümü oynayım, sonrasına baxarıq. Gələcək haqqında indidən bir söz deyə bilmərəm”.

Fərəc ASLANOV