Samir Abasov: "Nə nəticə var, nə oyun"

"Bu gün üzüldüyüm əsas məqam uduzmaq deyil. Hər dəfə bir həftə rahatlaşıb, sonra özümüzü narahatlığa salırıq".

Futbolxeber.az saytının məlumatına görə, bu sözləri "Sumqayıt"ın baş məşqçisi Samir Abasov Azərbaycan Premyer Liqasının 33-cü turunda bu gün "Səbail"lə keçiriən oyundan sonra mətbuat konfransında deyib.

O, evdə 1:3 hesabı ilə uduzduqları matçı belə şərh edib: "Azarkeşlərimizə görə məyusam, sona qədər bizi dəstəklədilər, sağ olsunlar. Nə nəticə var, nə oyun. Buna baxmayaraq, yanımızda oldular. Belə olmaz... Qarşıda üç oyun var və rəqiblərimiz çətindir. Rəqiblərimizin oyunları da həlledici olacaq".

S.Abasov "Bu cür oyunla Premyer Liqada qalmaq mümkün olacaqmı" sualını da cavablandırıb: "Ətrafımızda olan komandalar dəhşət oynayır? Yox, bir həftə sən, bir həftə onlar pis oynaya bilərlər. Ona görə haqlı yerlərdəyik. Biz oyunu başa düşmədik. Tələsməmək lazım idi. Futbolçular ikinci hissəyə çıxanda dedim ki, topu ayağımızda saxlayanda digərləri ona baxmasın. Fasilədən sonra oyun rahat gedirdi. Rəqibin də yüksək təzyiqi yox idi. Əfsuslar olsun ki, özümüz oyunu hədiyyə verdik. Görək, qarşıdakı oyunlarda necə olacaq".

Baş məşqçi komandasının ardıcıl qollar buraxması haqda da danışıb: "Bilmədiyimiz səbəb yoxdur. Səbəb bu cür futbolçu olmağımızdır. Qol vurmalı olduğumuz anda qapımızda qol gördük. Məşqdə etdiklərimizi oyunda görmürük. Həmin futbolçuları da meydanda görə bilmirik. Sanki fərqli oyunçulardır. Bu problemləri yaşayırıq ki, bu gündəyik. Stabil deyilik. Çempionat bitsin, ümumi fikirləşməyə məcburuq ki, baxaq, qalib gəldiyimiz oyunlarda biz nəsə etmişik, ya rəqib".