"Şamaxı" Premyer Liqada qalmağa layiqdir”

"Ötən dövrənin yüksəlişdə olan komandasına qarşı oynayırdıq. Onların həm yerli, həm də əcnəbi oyunçuları yüksək keyfiyyətə malikdilər. "Kəpəz"in sürətli, texnikalı oyunçularına qarşı layiqincə mübarizə apardıq. Təəssüf ki, qalib gələ bilmədik. Amma qələbəyə yaxın idik".

Futbolxeber.az saytının məlumatına görə, bu sözləri "Şamaxı"nın baş məşqçisi Vüqar Əsgərli Azərbaycan Premyer Liqasının 31-ci turunda evdə "Kəpəz"lə 1:1 hesabı ilə heç-heçə etdikləri oyundan sonra keçirilən mətbuat konfransında deyib.

O, futbolçularına təşəkkür edib: "Gənc və istedadlı futbolçularımızın Premyer Liqada qalması üçün sona qədər mübarizə aparacağıq. Matçlara gələn azarkeşlərə də minnətdaram. Amma ümid edirəm ki, onların sayı daha çox olacaq və biz öz meydanımızda dəstəksiz qalmayacağıq. Çünki komandamız Premyer Liqada qalmağa layiqdir”.