Musa Qurbanlı: “Uşaqlıq arzum həyata keçdi”

“Qarabağ”ın futbolçusu Musa Qurbanlı Avropa Konfrans Liqasının pley-off mərhələsində “Gent”ə qalib gəldikləri (1:0) oyun haqqında danışıb.

Futbolxeber.az saytının məlumatına görə, o, matçdan sonra “CBC Sport”a açıqlamasında əvvəlcə görüş haqda təəssüratlarını bölüşüb:

“Komandamızın çıxışını çox yaxşı dəyərləndirirəm. Uzun fasilədən sonra Avropa arenasında ilk oyunumuz idi. Matçın ilk dəqiqlərində hər iki komanda çətinlik çəkdi. Daha sonra öz oyunumuz tapdıq. Əsas da ikinci hissənin əvvəllərindən oyunumuzu yaxşılaşdırdıq. “Gent” isə durmadan pressinq edirdi. Bizim üçün çətin rəqib idi. Əzmkarlıq göstərdik və qalib gəldik”.

20 yaşlı forvard avrokuboklarda ilk dəfə start heyətdə meydana çıxması haqda da danışıb: “Həyəcan olmağı təbii ki, normaldır. Mənim üçün çox xoş oldu. “Qarabağ”ın oyunlarına baxa-baxa böyümüşəm. Həmişə arzum olub ki, bu arenada, bu azakeşlərin önündə oynayım. Ona görə də sözlərlə açıqlaya bilməyəcəyim bir hisslər keçirdim. Necə deyərlər, uşaqlıq arzum bu gün həyata keçdi”.