4 Fevral 2023, Şənbə
“Qarabağ” “Kəpəz” səfərində
XXI turun hakim təyinatları
U-21 millimizin rəqibləri müəyyənləşdi
Renatın qolu “Qrasshopper”i xilas etmədi

Ölkə futbolu

Yazmadığım statuslar və ya yuxuma girən Mahmud Qurbanov

“PROFESSOR”LA NƏLƏRDƏN DANIŞDIQ?

Deyilənə görə, oyandıqdan sonra ilk 5 dəqiqədə gördüyümüz yuxunun 50 faizini, 10 dəqiqə tamamında isə 90 faizini unuduruq. Dünən gecə gördüyüm yuxunun neçə faizini xatırladığımı bilməsəm də, məğzi yadımdadır: Mahmud Qurbanovla “Səbail”in hazırkı durumu barədə müzakirə aparırdıq. Qurbanova bildirdim ki, “Mahmud bəy, sizə bir nəfər qeyri-rəsmi köməkçi lazımdı. Bilirəm, “Səbail” rəsmiləri arasında peşəkar kadrlar çoxdur, eləcə də Zaur Ramazanov kimi köməkçiniz var. Amma bəzi futbolçuların ipini yığacaq, yeri gələndə yumruğunu stola çırpacaq bir nəfərə ehtiyac var. Çünki belə görünür ki, bəzi futbolçuların qulaqburmasına ehtiyac var...”

Yuxu ilə bağlı onu da deyirlər ki, adətən düşündüyün mövzu, fikirləşdiyin hansısa məsələ yuxuna girir. Amma dünənki yuxumun səbəbi, məncə, noyabrın 12-də feysbukda yazmadığım statuslardı. Həmin gün “Zirə” - “Səbail” oyunundan öncə status yazacaqdım ki, “mənə görə bu oyun cari mövsümün ən bəxtsiz iki baş məşqçisinin qarşıdurmasıdır”. Amma nə həmin statusu, nə də oyundan sonra Qurbanova istefa ilə bağlı ünvanlanan suala görə beynimdəkiləri telefondakı problemə görə yaza bilmədim...

Mənə görə, indiki məqamda Mahmud Qurbanovun işinə qiymət vermək üçün çox tezdir. Bəli, geridə qalan 14 tur ərzində “Səbail”in nəticələri ürəkaçan deyil. Komanda cəmi 2 qələbə qazanıb. Amma “Səbail”in bugünkü problemi məşqçidədirmi? Təbii ki, xeyr. Mahmud Qurbanov son illər “Neftçi”nin ikinci komandasındakı işi ilə nəticə qazanmaq bacarığını sübut edib. Hətta əsas komandanın hər uğursuzluğunda “Mahmud Qurbanov “Neftçi”nin baş məşqçisi təyin olunsun” fikri səslənirdi. İndi nə oldu bəs? Axı hər birimiz tez-tez “yerli məşqçilərə şans vermək, dəstək olmaq lazımdır” deyirik. Nə dəyişib ki? Mahmud Qurbanovun “Səbail”də fəaliyyətə başlamasından təxminən 5 aydan bir qədər artıq vaxt keçib. Komanda formalaşdırmaq üçün isə bəzən 5 ay yox, 5 il belə lazım olur. Qurban Qurbanov nümunəsi ortadadır. Çətin vaxtlarda klub rəhbərliyi baş məşqçisinə şans verdi, ona inandı, sonadək dəstəklədi və “Qarabağ”ın çalışdırıcısı da işi, qazandığı nəticələri ilə bu etimadın, inamın, dəstəyin qarşılığını artıqlaması ilə verdi. Təsadüfi deyil ki, bu gün “Neftçi”nin “Qarabağ”dan geri qalmasının əsas səbəbi kimi istər mütəxəssislər, istər azarkeşlər məhz paytaxt klubunun tez-tez məşqçi dəyişməsini göstərirlər...

“Səbail” son illər autsayder olub, son 2 mövsümdə Premyer Liqanı sonuncu pillədə başa vurub. Cari mövsüm öncəsi komandanın heyətində köklü dəyişikliklər olsa da, məğlub psixologiyasını beyinlərdən çıxarmaq bir həftənin, bir ayın işi deyil. Üstəlik, yayda komanda ətrafında xeyli söz-söhbət yaranmışdı: “Səbail”in büdcəsi də, iddiası da artır. Çoxları komandanın daha iddialı olacağını proqnozlaşdırırdılar. Lakin bəxt amilini də unutmaq olmaz. Bəlkə də mövsümün əvvəlində, məsələn, II turda üstün olduğu “Turan Tovuz”la oyunda, yaxud növbəti tur “Şamaxı” səfərində bəxt rəqibin deyil, “Səbail”in tərəfində olsaydı, indi vəziyyət fərqli olardı, bəlkə də bu gün “Səbail” 7-ci pillədə yox, ilk “beşlik”də qərarlaşardı.

Məşqçini, ümumiyyətlə hansısa insanı silmək asandı. Qazandırmaq isə hər oğulun işi deyil. “Sabah”la oyundan sonra mətbuat konfransında “Səbail”in çalışdırıcısına “Sizin necə futbolçu olmağınız hamıya məlumdu. İndi komandanızın bu cür futbol sərgiləməsi sizə necə təsir edir” sualı ünvanlanmışdı. Qurbanov suala cavabında bildirmişdi ki, “Komandamızın belə oyunu tək mənə yox, hamımıza pis təsir edir. Futbolçu kimi necə iddialıydımsa, bu gün də eləyəm. Nəsə düzəltmək istəyirik. Lakin  yaxşı komanda qurmaq tez əmələ gəlmir. Bəhanə gətirmək istəmirəm, amma vaxt lazımdı və istədiyimiz futbolçuları heyətə qatmalıyıq”.

Həqiqətən də, Mahmud Qurbanov iddiasını futbolçu kimi qazandığı çempionluq sayı ilə sübut edib. “Professor” ləqəbini isə ona Azərbaycanda yox, SSRİ-nin ən güclü futbol məktəblərindən biri olan Ukraynada veriblər. Ukrayna belə dəyər verilən Mahmud Qurbanova vətəndə şans tanımaq olmaz? Meydanı görmək qabiliyyətinə görə “Professor” adını alan Qurbanov ən qısa zamanda futbolçuları görmək qabiliyyətini də ortaya qoyacaq. Təkcə futbolçu kimi deyil, məşqçi kimi də professor olduğunu isbatlayacaq. Bunun üçün sadəcə səbrli olmaq lazımdı - zaman, zaman, yenə də zaman...

İbrahim CƏFƏROV




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Fevral 2023
B.eÇ.aÇC.aCŞB
01 02 03 04 05
06 07 08 09 10 11 12
13 14 15 16 17 18 19
20 21 22 23 24 25 26
27 28