Sessi D`Almeyda: “Bəzən bir nəfərin səhvi görünür, amma uduzan komandadır”

“Neftçi”nin yarımmüdafiəçisi Sessi D`Almeydanın Futbolxeber.az saytına müsahibəsi

- Azərbaycan Kubokunun 1/8 final mərhələsində əlavə vaxtda “Zirə”yə məğlub oldunuz (0:1). Məğlubiyyəti necə şərh edərdini?

- Bu oyunda uduzmağı haqq etmirdik. Qələbəyə daha yaxın olan tərəf biz idik. Birinci hissəni də, ikinci hissəni də yaxşı oynadıq, lain yekunda uduzduq. Oyunu əlavə vaxtda itirdik. Buna baxmayaraq, mübarizə apardıq, döyüşdük. Təəssüf ki, bu, qələbə qazanmaq üçün kifayət etmədi.

- Əlavə vaxtda elə görünürdü ki, sanki güc qalmayıb və “Neftçi” penaltiləri gözləyir...

- Mən də elə hiss etdim. Sonadək gücümüz qalmamışdı. Ayaqlarımız irəli getmirdi. Bu da məğlubiyyətə səbəb oldu – oyunu qazanmaq üçün güc çatmadı.

- Siz mübarizə apardıq deyirsiniz, razıyam. Lakin bunu hamıya aid etmək olmur. Məsələn, Varqas topu götürdükdən sonra heç kimə ötürmə vermir, hər dəfə driblinq edir və topu itirirdi. Qol da məhz onun top itkisindən sonra vuruldu...

- Bilirsiniz, bu futboldur. Driblinq etmək onun oyun üslubudur. Biz də arxasında olmalı, onu sığortalamalıyıq. Bir nəfəri günahlandırmaq düzgün deyil. Futbol səhv oyunudur. Bəzən bir nəfərin səhvi görünür, amma uduzan komandadır. O, topu itirdi, bəli, amma biz onu sığortalamlı idik. Məsələ budur.

- Samir Abasovun gedişindən sonra “Neftçi”də nəsə dəyişib?

- Müəyyən qədər də olsa, müsbətə doğru dəyişiklik var. Futbolçuların komanda üçün daha çox fədakarlıq etdiyini görürəm. Yeni baş məşqçi ilə müsbət dəyişikliklər var – yeni düşüncə, yeni yanaşma... Ona işləmək üçün imkan versək, böyük işlər görəcəyinə inanıram.

- “Neftçi” son 4 oyunda qələbə qazana bilməyib, turnir cədvəlində 7-ci yerdəsiniz və kubokda mübarizəni dayandırdınız. Halbuki “Neftçi”nin yaxşı heyəti, lazımi şəraiti var. Rəhbərlik komandanın uğur qazanması üçün hər şeyi edir. Bəs problem nədədir? “Neftçi” niyə uğursuzluğa düçar olur?

- Məncə, indi elə bir dövrdəyik ki, komanda ilə məşqçi heyəti arasında yeni bir bağ yaranır. Komandaya yeni nəfəs, yeni ab-hava gəlib. Bu taktiki yanaşma və inamla məşqçiyə işləmək imkanı versək, istədiyimiz yerə çatacağıq. Mən buna inanıram.

- Bəzən düşünürmürsünüz ki, “Neftçi”yə gəlməklə səhv seçim etmisiniz?

- Xeyr, xeyr. Mən belə düşünmürəm. Burada məsələ “Apollon” yaxşıdır, “Neftçi” yaxşıdır” deyil. Mən bura məqsədlə gəlmişəm, nəsə qazanmaq üçün. “Neftçi” ambisiyaları olan böyük klubdur. Amma klubun da, futbolçuların da müəyyən vaxta ehtiyacı olur. “Vaxt lazımdır” demək çətindir, çünki artıq dekabrdır. Amma yenə də inanıram – həm özümə, həm komandaya. Bizə sadəcə bir dönüş nöqtəsi lazımdır. Məşqçi, Abubakar gəlib və onunla birlikdə komandada böyük inam yaranıb. Bizim güclü futbolçularımız var. Hiss edirəm ki, nəsə gəlir, nəsə dəyişir. Bu gün uduzduq, bəli. Amma bu o demək deyil ki, zəifik. Bu mövsüm nəsə əldə edəcəyik – mən buna çox inanıram. Sadəcə daha çox mübarizə aparmaq lazımdır. Meydanda yıxılan futbolçu qalxıb geri qaçmalıdır.