“Neftçi”nin baş məşqçi məsələsində son durum: Nə türkiyəli, nə belaruslu...

Samir Abasovla yollarını ayıran “Neftçi”nin yeni baş məşqçisi müəyyənləşmək üzrədir.

Futbolxeber.az saytının məlumatına görə, “ağ-qaralar” hazırda yalnız bir mütəxəssislə danışıqlar aparır. Bu, Yuri Vernudubdur və görünən odur ki, məhz ukraynalı mütəxəssis Samir Abasovun xələfi olacaq.

Mətbuatda “ağ-qaralar”ın Abdulla Avcı və Viktor Qonçarenko ilə danışıqlar apardığı barədə xəbərlər yayılıb. Lakin bunlar həqiqət əks etdirmir. Ümumiyyətlə, heç bir türkiyəli mütəxəssisin “Neftçi”nin baş məşqçi postuna namizədliyi belə irəli sürülməyib. Hətta klubun baş icraçı direktoru Cenk Sümerin bu məqsədlə Türkiyəyə yollanması barədə deyilənlər də şayiədir.

O ki qaldı Viktor Qonçarenkoya, Samir Abasovun gedişindən sonra belaruslu mütəxəssis namizədlər sırasında yer almayıb.

Odur ki, hər hansı qeyri-adi hal yaşanmasa, “Neftçi” tezliklə Yuri Vernidubun təyinatını açıqlayacaq.

Xatırladaq ki, ukraynalı mütəxəssis baş məşqçi kimi 2011-2019-cu illərdə “Zarya”da (Ukrayna), 2019-2020-ci illərdə Soliqorsk “Şaxtyor”unda, 2020-2022-ci illərdə isə “Şerif”də (Moldova) çalışıb. Onun son iş yeri isə 2022-2025-ci illərdə Ukrayna “Krivbass”ı olub.

59 yaşlı mütəxəssis “Zarya” ilə 2016/17, “Krivbass”la isə 2023/24 mövsümündə Ukrayna çempionatının bürünc medalını qazanıb. 2020/21 və 2021/22 mövsümlərində isə Vernidub “Şerif”lə birgə Moldova çempionu olub.

O, 2016-2018-ci illərdə Ukraynada, 2021-ci ildə Moldovada ilin məşqçisi seçilib.