Qurbanov: “...ustalıq çatmadı”

Azərbaycan Premyer Liqasının XIII turunda öz meydanında “Səbail” öz meydanında “Sabah”a 0:2 hesabı ilə uduzub.

Futbolxeber.az saytının məlumatına görə, matçdan sonra təşkil olunan mətbuat konfransında “Səbail”in baş məşqçisi Mahmud Qurbanov komandasının məğlubiyyətini belə şərh edib:

“İlk növbədə klubumuz adından hər kəsi qarşıdakı Zəfər Günü münasibəti ilə təbrik edirəm. Allah şəhidlərimiz rəhmət eləsin, qazilərimizə cansağlığı versin. Oyuna gəldikdə, matça yaxşı başlamışdıq. Amma sonradan rəqib üstünlüyə yiyələndi. Uduzanda deyiləsi söz çox olur. Lakin mətbuat yox, futbolçular üçün. Meydana qələbə üçün çıxmışdıq. Təəssüf ki, istəyimizə çata bilmədik”.

- İlk dövrədə səfərdə “Sabah”dan xal almışdıq. Bu dəfə nə çatışmadı?

- Bu dəfə ustalıq çatmadı. Son oyunlarda fərdi səhvlərdən qollar buraxırıq. Bu gün qələbə qazanmaq istəyirdik. Təəssüf ki, alınmadı. Rəqibin fərdi ustalığı və fərdi səhvlər qələbəyə buna imkan vermədi.

- 13 turdan sonra 10 xal toplamısız. Baş məşqçi təyin olunarkən bu nəticəni gözləyirdiz?

- Xeyr, daha yuxarı pillələrdə olacağımızı gözləyirdim. Reallıq odur ki, aşağı dördlükdəyik. Amma əlimizi yanımıza salmayacağıq, Sona kimi mübarizə aparacağlıq.

- Çox üzgün görünürsünüz...

- Məğlubiyyət həmişə əhval-ruhiyyəyə təsir edir. Çalışırıq əlimizdəki futbolçulara şans verək. Məni ən çox narahat edən odur ki, onları bunu başa düşmürlər.

- Görünür ki, heyət mütləq güclənməlidi. Artıq indidən bu barədə fəaliyyətə başlamısız?

- Qarşıda hələ çox oyunlar var. Bu gün əsas heyətin 4 üzvü meydanda yox idi. 2 nəfər cəzalı, 2 nəfər isə zədəli idi. Futbolda müdafiə olunmaq asandı, amma hücum edən zaman çox güc düşür. Bu gün sağ cinahdan pis təsir bağışlamasaq da, sol cinahda axsayırdıq. İndidən transferlər barədə düşünmürük. Amma ümumilikdə təbii ki, güclənməliyik.

- Qapıçı dəyişikliyi nə ilə bağlı idi: zədə, yoxsa oyununa görə Hüseynqulu Quliyevi əvəzlədiz?

- Hər iki amilimn təsiri oldu, Keçən oyun müdafiəçi, bu gün qapıçı səhv etdi. Lakin sona qədər gənclərə dəstək olacağıq. Bacardığımız şeyləri etməliyik.

- İndidən qış transfer pəncərəsi üçün gözaltı etdiyinzi futbolçular var?

- Maraq dairəmizdə olan futbolçular var. Xüsusən də yerliləri heyətə qatmaq istərdik. Lakin indiki halda əlimizdəki heyətlə ilin sonuna qədər mübarizə aparacağıq.

- Sizin necə futbolçu olmağınız hamıya məlumdu. İndi komandanızın bu cür futbol sərgiləməsi sizə necə təsir edir?

- Komandamızın belə oyunu tək mənə yox, məncə, hamımıza pis təsir edir. Futbolçu kimi necə iddialıydımsa, bu gün də eləyəm. Nəsə düzəltmək istəyirik. Lakin  yaxşı komanda qurmaq tez əmələ gəlmir. Bəhanə gətirmək istəmirəm, amma vaxt lazımdı və istədiyimiz futbolçuları heyətə qatmalıyıq.