"Ferentsvaroş"un qapıçısı: "İkinci hissədə biz daha çox nəticəni qorumağa çalışdıq"

"Ferentsvaroş"un (Macarıstan) kapitanı Deneş Dibus Çempionlar Liqasının 3-cü təsnifat mərhələsində "Qarabağ"la Bakıda 1:1-lik heç-heçə bitən görüş haqda fikirlərini bölüşüb.

Futbolxeber.az saytının məlumatına görə, macar qolkiper oyunun ağır şəraitdə keçdiyini bildirib: 

"İkinci hissədə biz daha çox nəticəni qorumağa çalışdıq. Oyun şəraiti ağır, rütubət yüksək idi. Stadion çox gücümüzü aldı. Qarşılaşmada nəticə rəqibin xeyrinə də bitə bilərdi, çünki onların da şansları vardı. Səfərdəki heç-heçədən narazı qala bilmərik. Buraxdığımız qolda bir az bəxtimiz gətirmədi. “Qarabağ”ın yaxşı komanda olduğunu gördük. Bütün bildiklərimiz ikinci oyunda bizə lazım olacaq. Bunu evdə - öz tamaşaçılarımızın qarşısında etmək lazımdır”.

Qeyd edək ki, bu komandalar arasında cavab oyunu avqustun 9-u Budapeştdə olacaq.