De Byazi: “Adətən uduzanda səhv məşqçidə olur”

“İlk hissədə çoxlu imkanlarımız oldu. Təəssüf ki, yaratdığımız 4-5 qol imkanından istifadə edə bilmədik. Hətta deyərdim ki, mən baş məşqçi təyin olunduğumdan gündən bəri ən yaxşı ilk hissəni oynadıq”.

Futbolxeber.az saytının məlumatına görə, bu sözləri milli komandamızın baş məşqçisi Canni de Byazi UEFA Millətlər Liqasının ilk turunda Qazaxıstana qarşı keçirilən oyundan sonra deyib. 

İtaliyalı mütəxəssis 0:2 hesablı məğlubiyyəti belə şərh edib: “Start heyəti oyuna çox yaxşı başladı. İkinci hissədə 26 metrdən qol buraxdıq. İkinci qol isə böyük diqqətsizlikdən oldu. Hansı ki təcrübəli futbolçular belə səhv etməməlidirlər. 2:0-dan sonra oyunda dönüş yaratmaq çox çətin idi. Təəssüf ki, oyunumuz uğursuz nəticələndi. Futbol elə oyundur ki, yaratdığın qol imkanlarından istifadə etməlisən, etməsən nəticədə məğlub olacaqsan. Adətən uduzanda səhv məşqçidə olur”.