De Byazi: “Futbolçularıma inanıram”

“Sabah qrupda 3-cü oyunumuzu keçirəcəyik. Çox vacib qarşılaşmadır. İlk iki oyunumuz qrupun ən güclü komandalarına qarşı olub”.

Futbolxeber.az saytının məlumatına görə, bu sözləri milli komandamızın baş məşqçisi Canni De Byazi sabah DÇ-2022-nin seçmə mərhələsi çərçivəsində Lüksemburqa qarşı keçiriləcək matçdan öncə təşkil olunan mətbuat konfransında deyib.

İtaliyalı mütəxəssis bildirib ki, komandası yaxşı oyun nümayiş etdirəcək: “Sabah meydana ən yaxşı və ən hazırlıqlı futbolçular çıxacaq. Az müddətdə 3 vacib görüş keçirəcəyik. Əlimizdən gələni edəcəyik. Fikirləşirəm ki, yaxşı oyun nümayiş etdirəcəyik”.

De Byazi futbolçularına inandığını qeyd edib: “Bir gündə hər şeyi dəyişmək olmaz. Yaxşı kollektivimiz var. Futbolçularıma inanıram. Komandamız getdikcə daha da inkişaf edir. Komanda meydanda xarakter göstərsə, qalib gələ bilərik. Rəqibin heyətində xeyli sayda legioner var. Gözəl meydançada oynayacağıq. İnanıram ki, qalib gələn tərəf biz olacağıq".