"Makkabi"nin baş məşqçisi: "Bu nəticə bizi qane edir"

“Oyuna yaxşı başladıq. Sonra üç qol buraxdıq. Şadam ki, 1:3-dən geri dönə bildik və heç-heçəyə nail olduq".

Futbolxeber.az saytının məlumatına görə, bu sözləri “Makkabi”nin (Hayfa, İsrail) baş məşqçisi Barak Baxar Konfrans Liqasının pley-off mərhələsinin “Neftçi” ilə ilk görüşündən (3:3) sonra mətbuat konfransında deyib.

O, Bakıdakı nəticənin onları qane etdiyini bildirib: "Bir həftədən sonra cavab görüşü keçiriləcək. Biz doğma azarkeşlərimiz önündə oynayacağıq. “Neftçi” güclü komandadır və eyni səviyyəli rəqiblər oynayırdı. Rəqibin ilk qolu gözəl alındı. Sonra ruhlanıb daha iki qol vurdular. Bu nəticə bizi qane edir”.

Barak Baxar “Neftçi”nin cəmi 17 dəqiqədə oyunu dəyişdiyini bildirib: “Sabir Buqrin Mərakeş yığmasına çağırılıbsa, yaxşı oyunçudur. Yusuf Laval da yaxşı futbol göstərdi. Emin Mahmudovu da fərqləndirərdim. “Neftçi” 17 dəqiqə ərzində oyunu dəyişib üç qol vurdu. Həmin dəqiqələrdə meydanda bir komanda var idi. Amma sonradan oyunun axarı yenə dəyişdi. Əsas məqsədimiz qrupa çıxmaqdır. Hər şeyə hazırıq. Cavab görüşündə nə biz dincələcəyik, nə də “Neftçi”.