İstənmədən “Neftçi”yə verilən xeyir

Koronavirusa görə bütün dünya futbolunda olduğu kimi, Azərbaycan futbolunda da durğunluqdu. Hamı mayın 4-də klubların məşqə başlayacağını, 23-də isə Premyer Liqamızın yenidən start götürəcəyini gözləsə də, ötən həftə karantinin müddəti mayın 31-nə kimi artırıldı. Bu isə futbolsuz günlərin bir qədər də uzanması deməkdi.

Futbolsuz qaldığımız bu vaxtda son günlərin əsas müzakirə mövzusu “Neftçi”di. Yəqin daşıdığı Flaqman adının ağırlığındandır ki, “ağ-qaralar” futbol olmadığı bir dövrdə də ən çox müzakirə olunan klubumuzdur. Həmkar etikasını gözləyib, “Neftçi” və “sportinfo.az” saytı arasındakı qalmaqaldan mümkün qədər kənarda durmağa çalışacağıq. Amma bəzi məqamlar var ki toxunmamaq qeyri-mümkündü.

Birincisi, həmin saytda Azərbaycan İdman Jurnalistləri Federasiyasının üzvlərinə qarşı təhqir dolu gedən yazının qəbulolunmazlığıdı. Daha əvvəl də qeyd etdiyimiz kimi, biz Azərbaycan İdman Jurnalistləri Federasiyasının üzvü deyilik, olmaq fikrimiz də yoxdu. Amma orda bizə xətri dünyalar qədər əziz olan insanlar var. Hansılar ki jurnalistikadan ağızdolusu danışanlara dərs keçərlər. Hansılar ki idman mətbuatındakı debillərin cəmini 100-ə vursan; yenə də o dəyərli dostların atılan dırnağı qədər dəyərli olmazlar. Bu “hansılar ki”ni xeyli uzada bilərik. Tənqidlə təhqiri ayıra bilməyənlər, özünü hamıdan "ağıllı" sayanlar - sözümüz sizədi, bir şeyi unutmayın ki kimdə nə yoxdusa, həmişə ondan danışır/yazır. Ona görə də ömrü boyu hər yazınızda "mən təmizəm, qalan hamı ləkəlidi" deməyə/yazmağa məhkumsunuz...

İkinci qeyd etmək istədiyimiz məqam isə odur ki, “Neftçi”ni “vurmaq” istəyənlər istəmədən “ağ-qaralar”a xeyir verirlər. Necə? Srağagün “Neftçi”nin Feysbuk səhifəsində məlum hadisə ilə bağlı paylaşım edilib. Həmin paylaşımın altında onlarla azarkeş komandaya dəstəyini nümayiş etdirir. İlk dəfədir görürük ki, hər hansı paylaşımın altında yazılan bütün şərhlər müsbətdi. Hətta klub rəhbərliyindən, baş məşqçidən, oyunçulardan, nəticələrdən narazı qalanlar belə indiki məqamda klubuna dəstəkdi. Necə deyərlər, hamı eyni yerə vurur, hamı “Neftçi”yə dəstək verir...

Və sonda. Dabo bir video paylaşdı, “Neftçi”nin karantini pozması iddia edildi, aləm dəydi birinə. Amma “Qarabağ” neçə yüz kilometr məsafə qət edib Ağdama getdi. Heç kim “karantini pozdular” demədi...

İBRAHİM