Elxan Məmmədov: “Həmin vaxt “Bakı” rəhbərliyi peşəkar davrandı”

“Əgər futbol klubları üçün sponsor yoxdusa, biz neyləyə bilərik?”

Futbolxeber.az saytının məlumatına görə, bunu AFFA-nın baş katibi Elxan Məmmədov deyib.

Hazırda Azərbaycan radiosu və “İdman” kanalının müştərək yayımı olan İlkin Babanın aparıcısı olduğu “Extra time” proqramında qonaq olan E.Məmmədov bildirib ki, Premyer Liqada iştirak etmək istəyən klub maliyyə sənədlərini təqdim etməlidir:

“2-3 il qabaq bir komanda Premyer Liqada çıxış etmək istəyirdi. Lakin onlar AFFA-ya maliyyə sənədlərinui təqdim edə bilmədilər. Dırnaqarası jurnalistlər vasitəsi ilə bizə qarşı təzyiq göstərməyə başladılar. Sonra nə oldu? 3 aydan sonra həmin şəxslərə qarşı ayrı sahədə maliyyə cinayət işi açıldı. Bu nə deməkdir? Belə çıxır ki, biz həmin komandanı Premyer Liqaya buraxsaydıq, klub 3 ay sonra fəaliyyətini dayandırardı. Bu halda necə olacaqdı?

Əvvəllər Premyer Liqada belə nümunələr olub. “Bakı” klubu yüksək liqada çıxış etdiyi son mövsümdə maliyyə problemi ilə üzləşdi. Həmin vaxt “Bakı” rəhbərliyi peşəkar davrandı. Bank təminatını aktivləşdirdi və mövsümün sonunadək çıxışını davam etdirdi. Həmin vaxt klub rəhbərliyi bankı təminatı təqdim etməsəydi, problem yaranardı”.

AFFA-nın baş katibi qeyd edib ki, bölgələrdəki futbol hələ ki Premyer Liqa səviyyəsində deyil:

“Bölgədə futbol var, amma I divizion səviyyəsində. Həmin klublar niyə Premyer Liqaya gəlmirlər? Çünki AFFA rəhbərliyinin tapşırığına əsasasən bölgə komandaları AFFA tərəfindən maliyyələşdirilir. Assosiasiyanın da maliyyə durumu bütün klubları maliyyəşdirməyə imkan vermir”.