Obradoviç: “Təbii ki, məğlub olmaq xoş deyil”

“Rəqibin gücü haqda əvvəldən məlumatımız var idi. Bilirdik ki, standart vəziyyətlərdən istifadə etməyi bacarırlar. Təəssüf ki, birinci hissəsinin sonunda qol buraxdıq”.

Futbolxeber.az saytının məlumatına görə, bu sözləri 21 yaşadək futbolçulardan ibarət milli komandamızın baş məşqçisi Milan Obradoviç deyib.

Avropa çempionatının seçmə mərhələsində Gürcüstana 0:3 hesabı ilə məğlub olan U-21 yığmamızın çalışdırıcı matçdan sonra CBC Sport-a açıqlamasında yenilgini belə şərh edib:

“İkinci hissənin əvvəlində azlıqda qaldıq. Bundan sonra oyunun gedişatını dəyişmək çətin idi. Uşaqlar çalışırdılar, 0:1, 0:2 hesabı ilə geridə olarkən də əllərindən gələni edərdilər. Amma 10 nəfərlə fərqlənmək çətin idi. Baxmayaraq ki, bu gün də 1-2 qol vura bilərdik. Təbii ki, məğlub olmaq xoş deyil.

Komandamızın üzvləri klublarında daim oynamırlar. Bu da qeyri-stabil çıxışa gətirib çıxarır. Ötən oyunda Slovakiya qarşı çox yaxşı oynamışdıq. 3-4 gündən bir oynamaq çətindi. Bəlkə də futbolçularımız ilk dəfə idi ki, 3-4 günə ardıcıl iki belə çətin oyun keçirdilər”.