"Farer adaları ilə heç-heçə nəinki futbolçulara, hamımıza çox pis təsir edəcək"

"Millimiz ilk dəqiqələrdən hücuma atılacaq. Düşəcək qol imkanlarından maksimum istifadə etmək lazımdı".

Bu sözləri Futbolxeber.az saytına açıqlamasında milli komandamızın sabiq hücumçusu Nadir Nəbiyev deyib.  Bu gün Millətlər Liqasının növbəti turu çərçivəsində yığma komandamız Farer adaları ilə qarşılaşacaq. Nəbiyev milliyə ən yaxşı oyunçularımızın dəvət olunduğunu bildirib: "Məncə, çempionatımızda son turlarda oyunu ilə seçilən futbolçular milliyə dəvət olunub.

Bizə görə ola bilər ki, kimsə kənarda qalsın, ancaq məşqçilər rəqibə görə millinin heyətini müəyyənləşdiriblər.  Hücum xəttində kifayət qədər təcrübəsi olan futbolçularımız var. Mirabdulla Abbasov əsas heyətdə olmasa da, ehtiyat olsa sonradan meydana daxil olub milliyə kömək edə bilər. Mənə elə gəlir ki, Rüfət Dadaşov hücum xəttində olacaq.

Çünki Farer adaları ilə səfərdəki oyunun ən yaxşılarından idi.   Mən qələbədən başqa heç nə fikirləşmirəm. Heç-heçə nəinki futbolçulara, bizə də çox pis təsir edəcək. Əgər hər birimiz millini dəstəkləsək, inanıram ki, uşaqlar bacardığından artığını edib bu oyunu da səfərdəki Kosova görüşünü də qalib başa vuracaq".  "Mətbuatdan oxuyanda ki, Farer adaları bir neçə gündü Bakıdadı, mənə təəccüblü gəldi. Bu onu göstərir ki, rəqib bu oyuna çox ciddi önəm verir" - deyə, Nadir Nəbiyev fikirlərini yekunlaşdırıb.