"Azərbaycana gəlməmişdən əvvəl çempionatın səviyyəsinin yüksək olmadığını düşünürdüm"

"Keşlə"nin müdafiəçisi Edvinas Qirdvaynis "Sumqayıt"la görüşdəki məğlubiyyəti şərh edib.

Futbolxeber.az saytının məlumatına görə, litvalı oyunçu komandasının növbəti məğlubiyyəti barədə bunları deyib: "Məğlubiyyət barədə nəsə demək çətindi. Biz qol imkanlarımızı reallaşdıra bilmədik, rəqib isə qol epizodlarından istifadə etdi. Komandaya kimin və nəyin kömək olacağını bilmirəm. Hamımız birləşib hazırkı durumdan çıxmalıyıq. Daha bu cür olmaz. Bizim yaxşı komandamız var, qalib gələrək hazırkı durumdan çıxmalıyıq".

"Maddi problem? Xeyr, elə bir problemimiz yoxdu. Qarşıda "Qarabağ" və "Qəbələ" ilə oyunlar bizi gözləyir. Bu çempionatda hər bir oyun ağır alınır. Heç bir komanda xalı elə-belə vermir. Azərbaycana gəlməmişdən əvvəl çempionatın səviyyəsinin yüksək olmadığını düşünürdüm. Amma indi görürəm ki, həqiqətən də burada bütün klublar futbol oynaya bilir" - deyə, Edvinas fikirlərini yekunlaşdırıb.