“Qəbələ” “Axmat”a məğlub oldu

Avstriyada təlim-məşq toplanışında olan “Qəbələ” bu gün hazırlıq prosesi çərçivəsində növbəti yoxlama oyununu keçirib.

Futbolxeber.az saytının məlumatına görə, Roman Qriqorçukun komandası Rusiya təmsilçisi “Axmat”la (keçmiş “Terek”) qarşılaşıb.

“Qəbələ” meydana aşağıdakı start heyəti ilə çıxıb:

Dmitri Bezotosnı, Vojislav Stankoviç, Rasim Ramaldanov, Vitali Vernidub, İlqar Qurbanov, Elvin Camalov, Qismət Alıyev, Ülvi İbazadə, Asif Məmmədov, Filip Ozobiç, Baqali Dabo

İkinci hissədə “Qırmızı-qaralar”ın heyətində Dmitri Bezotosnını Aqil Məmmədov, Ülvi İbazadəni isə Yusif Nəbiyev əvəzləyib.

Görüş “Qəbələ”nin 0:1 hesablı məğlubiyyəti ilə başa çatıb. Matçın taleyini həll edəan yeganə qolu 49-cu dəqiqədə Zaur Sadayev vurub.

Qeyd edək ki, ilk sınaq matçında yerli “Fulpmes”i 8:0 hesabı ilə darmadağın edən “Qəbələ” daha 2 yoxlama görüşündə qüvvəsini sınayacaq.

“Qırmızı-qaralar” iyunun 19-da “Botev” (Bolqarıstan), 22-də isə “Ludoqorets”lə (Bolqarıstan) qarşılaşacaq.