Maksim Medvedev: “Onu Prosineçkidən soruşun”

“Təəəsüf ki, uduzduq. Halbuki rəqibdən daha yaxşı oynadıq. Özümüzdə top saxlayırdıq, çalışırdıq kəsəli hücumlar quraq. Belfastadakı matça baxanda, bu gün yaxşı oynadıq. Qol imkanlarımız olsa da, yararlana bilmədik. Cavid, Əfran, Ramil fərqlənməyə yaxın idilər. Ümumilikdə, üstünlük bizdə idi. Sonda qol buraxıb uduzmağımız bizə böyük zərbə oldu”.

Futbolxeber.az saytına müsahibəsində bu sözləri milli komandamızın müdafiəçisi Maksim Medvedev DÇ-2018-in seçmə mərhələsində Şimali İrlandiyaya 0:1 hesabı ilə uduzduğumuz oyundan sonra deyib.

“Qarabağ”ın müdafiəçisi oyun ərzində tez-tez geri ötürmə vermələrinin səbəbini belə izah edib:

“İrəli gedib topu itirməkdənsə, onu özümüzdə saxlayıb, oyun qurmağa çalıırdıq. Rəqibi qaçmağa məcbur edirdik. İstəyirdik ki, onları yoraq, topsuz qoyurduq. Bu da alınırdı. Çünki zaman-zaman irlandlar əsəbləşirdilər, bir-birilərinin üstünə qışqırırdılar”.

Oyundan öncə millimizin baş məşqçisi Robert Prosineçki rəqibə sürpriz hazırladıqlarını söyləmişdi. Maraqlıdır, xorvat mütəxəssisin sürprizi nədən ibarət idi?

“Bu sualı Prosineçkiyə verin. Yəqin sürpriz bu gün rəqibdən üstün olmağımız idi. Qol imkanlarımız çox oldu”.

Maksim Medvedev qeyd edib ki, qarşıdakı görüşərdə daha inamlı oynamağa çalışacaqlar:

“Bu məğlubiyyətdən sonra şansımız azalsa da, ümidimiz var. Qarşıda hələ 4 oyunumuz qalıb. Əsas odur ki, oyunumuzu daha da yaxşılaşdıraq”.