Robert Prosineçki: “Qəbələ”nin bir ayağı qrup mərhələsindədi” (MÜSAHİBƏ)

Milli komandamızın baş məşqçisi Robert Prosineçki Futbolxeber.az saytına müsahibə verib. 

- Bu həftə “Qəbələ” və “Qarabağ” Avroliqada pley-off matçlarına çıxdılar. Klublarımızın çıxışlarını necə dəyərləndirə bilərsiz?

- Hər ikisi gözəl oyun sərgilədi. “Qəbələ”dən başlamaq istəyirəm. “Maribor”a qarşı çox gözəl çıxış etdilər və 3:1 yaxşı hesabdı. “Qəbələ”nin bir ayağı artıq qrup mərhələsindədi. “Qarabağ” da pis oynamadı. Amma lazımi nəticə qazana bilmədilər. 0:1 hesablı məğlubiyyət çox pisdi. Cavab oyununda “Qarabağ” mütləq qol vurmalıdı. Üstəlik, qapısını da toxunulmaz qorumalıdı. Çünki buraxılacaq 1 qol bütün planları alt-üst edəcək. Ümid edirəm ki, hər iki klubumuz qrup mərhləsinə vəsiqə qazanacaq.

- Milli komandamız DÇ-2018-in seçmə mərhələsində ilk oyununda San Marinonun qonağı olacaq. Bu görüşlə bağlı hazırlıq planları necədir?

- Vaxt azlığına görə yoxlama oyunu keçirməyə imkanımız yoxdur. “Qarabağ” və “Qəbələ” avqustun 25-də cavab matçlarına çıxacaqlar. Biz isə ayın 24-də toplanacağıq. İnanıram ki, San Marino ilə görüşdə yaxşı nəticə qazanacağıq.

- Dəvət göndərəcəyiniz futbolçuları artıq müəyyənləşdirmisiniz?

- Bu gün “Qarabağ” - “Neftçi” oyununu izləyirəm. Amma son toplanışda futbolçulardan razı qalmışdım. Ona görə də dəvət göndərəcəyim futbolçuları müəyyənləşdirmişəm.

- Heyəti nə vaxt açıqlayacaqsınız?

- Sabah.

- Ramil Şeydayev və Emin Mahmudovun millimizə gəlişi böyük sevinclə qarşılandı. Onların yığmamıza faydalı olacaqlarına siz də inanırsınız?

- Ramil Şeydayev və Emin Mahmudovun bizə kömək edib-etməyəcəkləri zamanla bilinəcək. Şeydayevə vaxt vermək lazımdı. O gəncdi, amma böyük istedadı var. Təəssüf ki, hələ ki öz klublarında çempionat oyununda forma geyməyiblər.

- Bu gün Türkiyə mətbuatında Deniz Yılmaza dəvət göndərdiyiniz barədə xəbərlər yayılıb. Həqiqətən “Bursaspor”un futbolçusuna təklfi göndərmisiz?

- Ona ilk dəfə 3 il əvvəl təklif edilib. Amma təklifi indi qəbul edib. Yaxşı, maraqlı futbolçudur. Üstəlik, “Bursaspor”da forma geyir. Onunla mən də danışmışam.

- 3 ildən sonra onun millimizin təklifini qəbul etməsinə səbəb nə ola bilər?

- Oyunçu millinin formasını geyməyi ürəkdən istəməlidir. Daha əvvəl təklifi qəbul etməmişdi. Türkiyə yığmasından dəvət gözləyirdi. Amma belə təklif gəlmədi.

- Qapı mövqeyi ilə bağlı seçiminizi etmisiniz? Kamran Ağayev, yoxsa Səlahət Ağayev?

- Hələ bilmirəm.