“Çelsi”nin müdafiəçisi Azərbaycan millisi ilə oyundan danışdı

“Azərbaycanla oyuna qədər komandada ab-hava heç də ürəkaçan deyildi. Amma indi hər şey qaydasındadı. Azarkeşlər bizdən nə gözləyirdilərsə, həmin nəticəni də göstərdik”. Futbolxeber.az-ın məlumatına görə, bunu Serbiya millisinin kapitani Branislav İvanoviç deyib.

Dünən yoxlama görüşündə Azərbaycan yığması ilə üz-üzə gələn serblər 4:1 hesabı ilə qələbə qazanıblar. Rəqibin qollarından ikisinə imza atan İvanoviç bu qələbənin onlar üçün çox vacib olduğunu söyləyib: “Statistika mühüm amildi, amma hər şeyi həll etmir. Mənim iki qol vurmağım vacib deyil. Meydançaya çıxanda heç bu barədə düşünmürəm də. Yeganə problemimiz stabilliyin olmaması idi. İnanıram ki, Azərbaycan üzərində qələbə buna son qoydu. Bununla futbolçularda Danimarka ilə oyun öncəsi özünəinam yenidən artdı. Bu, həyatımızın ən önəmli qalibiyyətlərindən biri ola bilər. Çünki Danimarka ilə matç bizim üçün finala bərabər olacaq. Azərbaycanı məğlub etmək də bu baxımdan çox önəmli ola bilər”.

Qeyd edək ki, yığmamız Avro-2016-nın seçmə mərhələsi çərçivəsində iyunun 12-də Norveçlə, Serbiya isə ertəsi gün Danimarka ilə qarşılaşacaq.

Mənbə: apasport.az