Prosineçki: “Serbiya kimi komandalarla başabaş mübarizə aparmaq üçün...”

“Hesab edirəm ki, yaxşı sınaq oyunu oldu. Birinci hissədə daha yaxşı oynadıq. Hesabı bərabərləşdirə bildik. Amma Serbiya millisinin üzvlərinin əksəriyyətinin Avropanın aparıcı klublarında çıxış etməsi nəticəyə təsirini göstərdi”. Futbolxeber.az-ın məlumatına görə, bu sözləri milli komandamızın baş məşqçisi Robert Prosineçki Serbiyaya qarşı baş tutan yoxlama oyunundan sonra deyib.

Xorvat mütəxəssis 1:4 hesablı yenilgini belə şərh edib: “Fərdi ustalıq öz sözünü dedi; qolların birini standart vəziyyətdən - künc zərbəsindən, ikisini isə uzaq məsafədən vurulmuş zərbələrdən sonra buraxdıq. Ümumilikdə, oyunu təhlil etməli olsaq, birinci hissədən razı qaldım. Serbiya millisi kimi komandalarla başabaş mübarizə apara bilmək üçün çox çalışmalıyıq. Toplanışın gedişindən razıyam. Noreç yığması ilə oyuna daha böyük motivasiya və istəklə hazırlaşmalıyıq. Buna nail olsaq, rəqibimizlə eyni səviyyədə oynaya bilərik” (affa.az).