“Prosineçki həm Serbiyaya, həm də Norveçə qalib gəlməyimizi istəyir”

“Hazırlıq plana uyğun davam edir. Məşqlərdə hər bir futbolçu tam gücü ilə çalışır. İlk öncə Serbiyayla oyuna hazırlaşırıq. Sonra Norveçlə görüş haqda düşünməyə kifayət qədər vaxtımız olacaq”. Futbolxeber.az saytına verdiyi açıqlamada bu sözləri hazırda Avstriyada təlim-məşq toplanışında olan milli komandamızın üzvü Coşqun Diniyev deyib.

Gənc futbolçu qeyd edib ki, baş məşqçi Robert Prosineçki qarşıdakı hər 2 oyunda millidən qələbə gözləyir: “Prosineçki hər məşqdə ciddi çalışmağımızı tələb edir. Öz tövsiyələrini verir və hər iki oyunda - həm Serbiya, həm də Norveçlə görüşlərdə qələbə qazanmağımızı istəyir. Baş məşqçinin istəyi ilə bütün komanda razıdır. Robert Prosineçki komandaya çox gözəl ruh aşılayıb. Əvvəlkindən fərqli olaraq, indi ancaq və ancaq qələbə haqda düşünürük. Onun gəlişindən sonra inamımız artıb. Gözəl oyun sərgiləyib, qələbə qazanmaq istəyirik”.