Azərbaycan millisinin qapıçısı: nəhs saylı uğurlu seriya

U-19 millimizin qapıçısı Ağaseyid Qasımov unikal göstərici ilə seçilir. Futbolxeber.az-ın Sankt-Peterburqa ezam olunmuş əməkdaşının verdiyi məlumata görə, Belarusla oyunun sonuna 2 dəqiqə qalmış məşqçilər Qasımovu meydana buraxıblar. Seriya zamanı Qasımov 11 metlik cərimə zərbəsi dəf etməsə də, millimizin ilk penaltisini məhz gənc qolkiper özü qola çevirib. Rəqibin bir zərbəsi qeyri-dəqiq alındığından, Azərbaycan millisi 5:4-lük qələbə qazanıb və bu nəticə ilə Qasımovun uğurlu seriyası davam edib. Belə ki, Ağaseyid Qasımov karyerası ərzində 13-cü dəfə penalti seriyasında iştirak edib və bütün hallarda sonda sevinən tərəf olub. 13 seriyanın hamısında Qasımovun komandaları qalib gəlib ki, bura həm klub, həm də milli səviyyəsində oyunlar daxildir.