“Neftçi” - “Xəzərə Lənkəran”: qonaq azarkeşlərin oyuna buraxılıb-buraxılmayacağı gələn həftə bilinəcək

Azərbaycan Premyer Liqasının beşinci turu çərçivəsində “Neftçi” öz meydanında “Xəzər Lənkəran”ı qəbul edəcək. Futbolxeber.az-ın məlumatına görə, sentyabrın 13-də keçiriləcək matçda qonaq azarkeşlərin iştirak edib-etməyəcəyi hələ ki bəlli deyil. Düzdür, 2013-cü ilin aprel ayının 26-da verilən qərarda qeyd olunub ki, bu qadağa həmin mövsümə aid olunur: “2013/2014 mövsümü Azərbaycan Premyer Liqası və kuboku matçlarında bu klubların öz aralarında keçirəcəyi oyunlarda qonaq komandanın azarkeşlərinin stadionlarda iştirakına qadağa qoyulur”.

Amma məsələ ondadır ki, qərar cari mövsümə də aid edilə bilər. Belə ki, bu məsələdə hər şey AFFA rəhbərliyinin qərarından asılıdır. Qarşıdakı günlərdə AFFA və PFL rəhbərlərinin görüşü baş tutacaq. Məhz həmin görüşdə qonaq azarkeşlərin “Böyük oyun”a buraxılıb-buraxılmaması barədə qərar veriləcək. Hələlik görüşdə hansı qərarın qəbul ediləcəyi bilinməsə də, böyük ehtimalla qərardan qüvvədən düşəcək.