Koke “Barselona” ilə oyunun hakimləri barədə: “Onlar satılıblar”

“Atletiko”nun kapitanı Koke La Liqanın 30-cu turunda “Barselona” ilə oyunun hakimlərindən narazı qalıb.

Futbolxeber.az saytının məlumatına görə, bir gün əvvəl məşqdə özünü narahat hiss etdiyi üçün qarşılaşmanı sona kimi ehtiyat oyunçular skamyasından izləyən Koke epizodların birindən hakimlərin qərarına sərt şəkildə reaksiya verib. “El Día después на Movistar Plus+” proqramında nümayiş olunan həmin epizodda Koke hakimləri nəzərdə tutaraq “Onlar satılıblar” deyə qışqırıb.

Xatırladaq ki, hazırda İspaniyada “Barselona”nın hakimləri pulla ələ alması ilə bağlı araşdırma gedir. Belə ki, “Barselona” Hakimlər Komitəsinin keçmiş vitse-prezidenti Mari Enrikes Neqreyreyə məxsus şirkətə 2001-2018-ci illər aralığında 7,3 milyon avro köçürməkdə ittiham olunur.