“Barselona”ya keçməməsinin səbəbini açıqladı: “Müharibəyə görə komandamı atıb gedə bilməzdim”

Hazırda “Şaxtyor”da məşqçi kimi çalışan Dario Srna vaxtı ilə “Barselona”nın təklifini geri çevirməsi haqda danışıb.

Futbolxeber.az-ın məlumatına görə, Donetsk klubunun rəsmi saytına danışan veteran futbolçu bildirib ki, müharibə şəraitində komandasını atıb getmək istəməyib:

“Bu qərarı ürəkdən qəbul etdim. Müharibə vaxtı “Şaxtyor”u atıb gedə bilməzdim. İstəmədim ki, insanlar Donetskdə olmadığımız üçün klubla vidalaşdığımı düşünsünlər. Hiss edirdim ki, bu, bizim, eləcə də “Şaxtyor”un, Donbassın həyatında mühüm məqamdı. İnsanlar məni Donetskdə çox sevirdilər, mən də onları. Odur ki, məni sevənləri məyus edə bilməzdim. “Barselona”ya keçmədiyim üçün peşman deyiləm. Ürəyimin səsinə qulaq asdım və “Şaxtyor”da qaldım”.

Qeyd edək ki, Srna 2003-2018-ci illər aralığında “Şaxtyor”da çıxış edib. Donetsk klubunu heyətində meydana çıxdığı 333 oyunda 33 qol vurub. Komandanın heyətində 9 dəfə Ukrayna çempionatının, 7 dəfə Ukrayna kubokunun, 8 dəfə Ukrayna Superkubokunun qalibi olub. 2008/09 mövsümündə isə “Şaxtyor”la birgə UEFA Kubokunu qazanıb. 2019-cu ildən isə Donetsk təmsilçisində məşqçi kimi çalışır.