"Maludanın zamana ehtiyacı var"

"Hücum baxımından əksiklərimizin olduğunu siz də görürsüz. Amma bu problemləri qısa bir zamanda həll edəcəyimizə inanıram". Futbolxeber.az-ın məlumatına görə, bu sözləri Avroliqanın III təsnifat mərhələsi çərçivəsində "Dinamo"ya qarşı keçirilən oyundan sonra "Trabzonspor"un baş məşqçisi Mustafa Akçay deyib. Akçay ev oyununda hər sürprizə hazır olduqlarını söyləyib: "Oyunçularımın anlaşmaları günü-gündən artır. Komanda olaraq, günü-gündən güclənirik. "Dinamo"nun statistikasına fikir verdikdə görərik ki, rəqib səfərdə daha yaxşı nəticələr göstərir. Bu səbəbdən də ev oyununda çox diqqətli olmalıyıq. İnanıram ki, evdə də qələbə qazanaraq, mərhələ adlayacağıq. 1:0-lıq qələbə mərhələ adlamaq üçün yaxşı nəticədir. Lakin biz cavab oyununda hər sürprizə hazır olmalıyıq. İstənilən halda, səfərdən sərfəli nəticə ilə qayıdırıq".

 

"Trabzonspor"un çalışdırıcısı komandanın yeni transferi Maluda haqda da danışıb: "Maluda oyuna yaxşı başlaya bilmədi. Lakin daha sona zəngin təcrübəsindən yararlanaraq, ağıllı işlər gördü və səviyyəsini ortaya qoydu. Maludanın bir qədər də zamana ehtiyacı var. Əminəm ki, gələcəkdə komandaya daha böyük fayda verəcək".