Bentu: "Bakıdakı oyunda bu səhvləri təkrarlaya bilmərik"

"Komandamız erkən qola düzgün reaksiya vermədi. Biz oyunun tempini aşağı saldıq və müdafiədə kifayət qədər aqressiv çıxış etmədik ki, bu da iki qol buraxmağımıza səbəb oldu". Futbolxeber.az xəbər verir ki, bu sözləri İsraillə oyundan sonra (3:3) Portuqaliya milli komandasının baş məşqçisi Paulu Bentu deyib.

P.Bentu Bakıda millimizə qarşı keçirəcəkləri oyunun çətin keçəcəyini bildirib: "Komandamız bu gün qələbə qazanmaq üçün kifayət qədər təhlükəli epizod yaratmağı bacardı. Amma həmin şanslardan faydalana bilmədik. Bizdən fərqli olaraq, İsrail əlinə düşən imkanlardan yararlandı. Bu, psixologiyadan irəli gəlir. Mən futbolçularla bu haqda danışmışdım.

Biz bu heç-heçədən dərs çıxarmalıyıq. Oyunçularım növbəti oyuna kimi bərpa olunmalıdırlar. Tezliklə bizi daha bir çətin oyun gözləyir. Həmin görüşdə bugünkü səhvləri təkrarlaya bilmərik. Bu, çox çətin oyun olacaq və biz taktiki cəhətdən müəyyən dəyişikliklər etməliyik".

Xatırladaq ki, Portuqaliya millisi növbəti oyununu martın 26-da Bakıda millimizə qarşı keçirəcək.