Cüneyt Çakırın təyinatı kimin lehinədir: ispanların, yoxsa italyanların? ARAŞDIRMA

Xəbər verdiyimiz kimi, “Yuventus” və “Barselona” arasında keçiriləcək Çempionlar Liqasının finalını türkiyəli Cüneyt Çakır idarə edəcək. Futbolxeber.az-ın araşdırmasına görə, bu mövsüm Çakırın Çempionlar Liqasında idarə etdiyi oyunlarda İtaliya klubları məğlubiyyət acısı yaşayıb. “Napoli” “Atletik”ə 1:3, “Roma” isə “Bavariya”ya 0:2 hesabı ilə uduzub. Türkiyəli referinin İtaliya və İspaniya klublarının iştirakı ilə fit çaldığı görüşlərin hamısı italyanların məğlubiyyəti ilə yekunlaşıb. Bayaq da qeyd etdiyimiz “Atletik” - “Napoli” (3:1) matçından başqa, “Vilyareal” - “Napoli”(2:1) və “Valensiya” - “Cenoa” (3:2) görüşlərini qeyd etmək olar.

Çakır “Yuventus”un 3 oyununu idarə edib. Bu görüşlərin ikisində qələbə qazanan Turin klubu (“Çelsi” - 3:0, “Şturm” - 2:1), 1 dəfə (“Benfika” - 1:2) meydandan məğlub ayrılıb.

“Barselona”ya gəldikdə, türkiyəli referi Kataloniya klubunun da 3 oyununda baş hakim olub. Bu görüşlərdən yalnız birində qələbə qazanan (“Benfika” - 2:0) “Barsa”, 2 matçda da heç-heçə oynayıb (“Çelsi” - 2:2, “Rubin” - 1:1). 3 oyunda Çakır “Barselona”nın lehinə 2, əleyhinə isə 1 penalti təyin edib. Qırmızı vərəqlərin sayında da bərabərlikdir - 1:1.

Ümumilikdə, bu mövsüm Avroliqada baş tutan “Roma” - “Fiorentina” matçının nəzərə almasaq, Çakır avrokuboklarda İtaliya klublarının 13 oyununu idarə edib. Bu oyunlarda 4 qələbə qazanan italyanlar, 2 dəfə heç-heçə oynayıb, 7 görüşdə isə uduzublar. Topların fərqi 18-21-dir.

Çakır İtaliya ilə yanaşı, 1 dəfə 2 ispan klubunun Avroliqa matçında da baş hakim olub. Söhbət “Sevilya” - “Betis” (0:2) matçından gedir. Həmin görüş hesablanmamaqla, türkiyəli referi 12 dəfə ispanların görüşünda baş hakim olub. Həmin oyunların 7-si İspaniya klublarının qələbəsi, 4-ü heç-heçəsi və yalnız biri məğlubiyyəti ilə yekunlaşıb. Topların fərqi də ispanların lehinədir - 23:12.