DÇ: 2 güləşçimiz finalda

Qazaxıstanın paytaxtı Nur-Sultanda keçirilən güləş üzrə dünya çempionatı sona yaxınlaşır.

Futbolxeber.az saytının məlumatına görə, 8-ci yarış günündə sərbəst güləş üzrə 61, 79, 86 və 97 kq-da mübarizəyə start verilib.

Mübarizəyə 1/8 finaldan qoşulan Əhmədnəbi Qvarzatilov sensasiyaya imza ataraq dünya çempionu Yovlis Bonne Rodrigerə (Kuba) qalib gəlib və 1/4 finala yüksəlib. Lakin bu mərhələdə o, dramatik keçən görüşdə Behnam Eşaq Ehsanpura (İran) uduzub. İranlı güləşçi finala yüksələ bilmədiyindən Qvarzatilov bürünc medal qazanmaq şansını itirib.

Cəbrayıl Həsənov da mundiala 1/8 finaldan start verib. Yığmamızın kapitanı Ukrayna güləşçisi Dmitri Tkaçenkoya yenərək 1/4 finala adlayıb. Bu mərhələdə Qalimjan Usserbayevi devirən Həsənov yarımfinala vəsiqə qazanıb. Yarımfinalda Slovakiya təmsilçisi Taymuraz Salkazanova 4:3 hesabı ilə qalib gələn təcrübəli pəhləvan finalda ABŞ təmsilçisi Kayl Deyklə qarşılaşacaq.

Aleksandr Qostiyev ilk görüşdə Özbəkistan idmançısı  Cavrail Şapiyevə məğlub olub.

Şərif Şərifov təsnifat mərhələsində Koreya güləşçisi  Minvon Seonu üstələyib. Olimpiya, dünya və Avropa çempionumuz Ukrayna güləşçisi Valeri Andreytsova gücünü göstərərək adını 1/4 finala yazdırıb. O, yarımfinalda ABŞ-ın olimpiya və ikiqat dünya çempionu Kayl Deyki də üstələməyi bacarıb - 5:2. Həlledici qarşılaşmada rəqib olimpiya, 3 qat dünya, 3 qat Avropa çempionu və Avropa Oyunlarının 2 qat qalibi Abdulrəşid Şadullayev (Rusiya) olacaq.