“Fariz Məmmədov zəhməti, əzmkarlığı, inamı ilə bu şansı özü əldə edib”

“Qəbələ”nin vitse-prezidenti Fariz Nəcəfov Azərbaycanın ilk peşəkar bokçusu, “Qəbələ” İdman Klubunun üzvü Fariz Məmmədovun peşəkar boks tariximizdə ilk dəfə olaraq WBF (World Boxing Federation) və WBCA versiyalarında dünya çempionu olması haqda danışıb. Futbolxeber.az saytına müsahibəsində Fariz Nəcəfov təcrübəli boksçunun Uqanda təmsilçisi Badru Lusambia üzərində qazandığı qələbəni belə şərh edib: “Dünənki döyüşü Fariz Məmmədovun vida görüşü kimi də qiymətləndirmək mümkündür. Özü qeyd etdi ki, “Qəbələ” klubunun rəhbərliyi üçüncü dəfə onun üçün vətəndə döyüşməyə şərait yaratdı. Lakin Fariz zəhməti, əzmkarlığı, inamı ilə bu şansı özü əldə edib. Biz də əlimizdən gələn dəstəyi ondan əsirgəmədik. Çox maraqlı, gərgin döyüş oldu. Yekunda da Fariz layiq olduğu qələbəni qazandı”.