“Bakı-2015”: 3 idmançımızdan yalnız 1-i 1/16 finala yüksələ bildi

Bu gün Tofiq Bəhramov adına Respublika Stadionunda Bakı-2015 Avropa Oyunlarında qadın oxatanlar arasında fərdi mübarizəyə start verilib. Futbolxeber.az-ın məlumatına görə, turnirdə ölkəmizi 3 qadın oxatan təmsil edir.

1/32 finalda Olqa Senyuk rumıniyalı Simona Bancila, Yaylagül Ramazanova gürcüstanlı Xatuna Narimanidze, Nurlanə Vəliyeva isə rusiyalı Kristina Timofeyeva ilə qarşılaşıb.

İdmançılarımızdan yalnız Olqa Senyuk mərhələ adlayıb. O, rumın rəqibinə 6:5 hesabı ilə qalib gəlib. Senyuk 1/16 finalda danimarkalı Maja Yaqerlə üz-üzə gələcək. İyunun 21-də keçiriləcək qarşılaşma 9:31-də start götürəcək.

Nurlanə Vəliyeva rusiyalı Kristina Timofeyeva 0:6, Yaylagül Ramazanova isə gürcüstanlı Xatuna Narimanidzeyə 4:6 hesabı ilə məğlub olaraq, mübarizəni dayandırıblar.