Bürünc medalçımız: “Söz verirəm ki, dünya çempionatında ...”

“İnanıram ki, mənə olan etimadı doğrulda bildim. Bürünc medal qazanmaqla Avropa tarixində ilk dəfə olaraq keçirilən idman bayramına adımı yazdırmaqdan çox şadam”. Futbolxeber.az-ın məlumatına görə, bu sözləri “Azərtac”a müsahibəsində “Bakı-2015” ilk Avropa Oyunları çərçivəsində keçirilən sərbəst güləş yarışlarında üçüncü yeri tutan Azərbaycan atleti Ruslan Dibirhacıyev söyləyib.

R.Dibirhacıyev deyib: “Əlbəttə, birinci yeri tutmaq, azarkeşlərə, ailəmə daha böyük sevinc yaşatmaq istəyirdim. Bürünc medal qazandım. Amma bu da məni sevindirir. Şadam ki, mənə olan inamı doğrulda bildim. Minlərlə adlı-sanlı idmançı arasında qələbə qazanmaq çox gözəl hissdir. Tamaşaçıların ürəkdən azarkeşlik etməsi mənə əlavə güc verdi. Buna görə də medalı onlara həsr edirəm. Bundan sonra dünya çempionatına hazırlaşacağam. Azarkeşlərə söz verirəm ki, dünya çempionatında qızıl medal qazanacağam”.