“Xəzər adaları” çempion!

Futzal üzrə ölkə çempionatında 18-ci turun oyunları keçirilib. Futbolxeber.az-ın məlumatına görə, günün ilk oyununda lider “Xəzər adaları” “Araz”la qarşılaşıb. Gərgin idman mübarizəsi şəraitində keçən matç “Xəzər adaları”nın 8:6 hesablı qələbəsi ilə tamamlanıb.

Günün ikinci oyunda liderin ən yaxın izləyicisi “Fənər” “Neftçi” ilə qarşılaşıb. Matç 3:3 hesabı ilə yekunlaşıb. Bununla da sona 2 tur qalmış “Xəzər adaları” çempionluğunu rəsmiləşdirib. Hazırda aktivində 48 xal olan “Xəzər adaları”, ikinci pillədə qərarlaşan “Fənər”dən 7 xal öndədir.

Qeyd edək ki, cari mövsümdə yüksək liqada oynamaq hüququ qazanan “Xəzər adaları”, ilk ildəcə Azərbaycan çempionu olmağı bacarıb.