“Khazar Islands” və “Damla MMC” sponsorluq müqaviləsi imzaladı

Bügün səhər saatlarında “Avesta” konsernin yerləşdiyi inzibati binada “Khazar Islands” futzal klubuyla “Damla MMC” arasında əməkdaşlıq müqaviləsi bağlanıb. Futbolxeber.az-ın məlumatına görə, “Khazar Islands”ın icraçı direktoru Fuad Qəmbərov və “Damla MMC”nin satış müdiri Ceyhun İdrisovun iştirakıyla rəsmiləşən müqaviləyə əsasən, “Damla MMC” qarşı tərəfi mövsümünün sonunacan içməli su təchizatıyla təmin etməyi öhdəsinə götürüb. Sonda Fuad Qəmbərov Ceyhun bəyə üzərində onun adı yazılmış klubun formasını hədiyyə edib.

Vurğulamaq lazımdır ki, indiyə qədər ölkə futzalı tarixində bu cür sponsorluq müqaviləsi imzalanmayıb. Ötən il yaranan və yüksək liqada ilk mövsümünü keçirən komandanın bu cür təşəbbüs göstərməsi olduqca maraqlı və xoş addımdı. Tədbirdən sonra hər iki tərəfin məsul şəxsləri əməkdaşlıq haqda fikirlərini bölüşüb.

Ceyhun İdrisov (“Damla MMC”nin satış müdiri): “Qeyd etməliyəm ki, “Khazar Islands” klubuyla əməkdaşlıq edəcəyimiz üçün məmnunuq. Razılaşdırdığımız kimi mövsümün sonunacan komandanı məşq və oyunlarında su təchizatıyla təmin etməyi öhdəmizə götürmüşük. Ümid edirəm əməkdaşlığımız uzun sürəcək”.

Fuad Qəmbərov (“Khazar Islands”ın icraçı direktoru): “Düşünürəm ki, ilkin olaraq rəsmiləşdirdiyimiz bu saziş ölkə futzalı tarixində bir ilkdi və bu ilki “Damla MMC” ilə yaşamaq bizə sevinc və qürur verir. Arzu edirəm ki, əməkdaşlığımız daha da böyüyərək dostluq körpüsünə çevriləcək. Avesta konserni olaraq “Damla” rəhbərliyinə və rəhbirliyi  təmsil edən Ceyhun bəyə təşəkkürümüzü bildiririk. İnşallah çempion olduqdan sonra avrokubok yarışlarında da “Damla” ilə “Avesta”nın bayraqları birgə dalğalanacaq”.