“Aznur”un kapitanı: “Hədəfimiz final yox, çempionluqdur”

Minifutbol üzrə ölkə birinciliyində çempionluq uğrunda mübarizəni davam etdirən 4 komandadan biri olan “Aznur”un qapıçısı və kapitanı Nuri Fətiyevin Futbolxeber.az saytına müsahibəsi

- Ölkə çempionatının yarımfinal mərhələsinin ilk oyununda “Real Bakı” ilə bərabərə qaldınız (2:2). Halbuki əvvəlki mərhələdə “Zirə”ni mübarizədən kənarlaşdırdıqdan sonra çoxları sizi bu cütün favoriti kimi görürdü. Birinci yarımfinal görüşündə qələbə qazanmağınıza nə mane oldu?

- Sözün düzü, komandada bir qədər rahatçılıq var idi. Əvvəlki mərhələdə 2 oyunun nəticəsinə əsasən “Zirə”ni 6:0 hesabı ilə üstələmişdik. “Zirə” bu çempionatın ən güclü 2 komandasından biridir. İlk mərhələdə 15 oyunun hamısında qələbə qazanmışdılar. Onları mübarizədən kənarlaşdırmaq bizim üçün çox xoş oldu. Lakin bu gün (söhbət dünən olub - red.) görünürdü ki, komandada bir qədər boşluq var idi. Bununla belə, mübarizə hələ bitməyib, qarşıda cavab oyunu var. Sözümüzü deyəcəyik, inşallah finala çıxacağıq.

- Yəni “Zirə”ni mübarizədən kənarlaşdırdıqdan sonra komandanızın hədəfi nə olur-olsun finala vəsiqə qazanmaqdır?

- Hədəf final yox, çempionluqdur. Bu turnirin ilk çempionu biz olmuşuq, 2018-ci ildə.

- Həmin vaxt “Peçat Dönər” adı ilə çıxış edirdiniz.

- Bəli, komandanın adı “Peçat Dönər” idi. Sonradan “Aznur” oldu. Amma eyni rəhbərlik, eyni baş məşqçidir.

- Yeri gəlmişkən, komandanızın adını “Peçat Dönər”dən “Aznur”a dəyişməyə səbəb nə oldu?

- “Peçar Dönər” adı bir qədər peşəkar görünmürdü. Çünki indi daha ciddi çempionatda mübarizə aparırıq.

- Son illərdə minifutbol çempionatında səviyyənin yüksəldiyini nəzərə alsaq, komandanızın potensialı çempionluğa imkan verir?

- Potensial var. Sadəcə problem ondadır ki, bizim komandamız bir qədər qeyri-stabildir. Güclü komandanı udub, bəzən zəifə 0:5 hesabı ilə uduza bilərik. Bunun nəticəsidir ki, pley-offa vəsiqəni də son turda təmin etdik. Amma gücümüz var, heç bir rəqibdən qorxmaq lazım deyil.

- 1/4 final mərhələsində “Zirə” aşkar favorit olsa da, onları mübarizədən kənarlaşdırdınız. Bunu nəyin hesabına bacardınız?

- Baş məşqçimizin bu uğurda böyük əziyyəti var. Rəcəb Fərəczadə bizi meydanda kompüter kimi idarə elədi. Eləcə də İlkin Hacıyevin adını çəkə bilərəm. Onun meydandakı rolu çöx böyük oldu.

- İlk oyunda 2:0 hesabı ilə qələbə qazanan “Birbaşa Bakı” finala çox yaxındır. “Aznur” əsas favoritdən sonra çempionu da üstələyə bilər?

- İnşallah bunu bacararıq. Əsas finala yüksələk, sonra o barədə düşünəcəyik. Həm də final cəmi 1 oyundur və 50 dəqiqə ərzində hər şey baş verə bilər.

- Yəqin ki, komandanızın hədəflərindən biri də Çempionlar Liqasında oynamaqdır.

- İlk dəfə çempion olanda Çempionlar Liqasında oynamışıq. Amma indi turnirin səviyyəsi fərqlidir. Təbii ki, bu turnirdə çıxış etməyi çox istəyirik.

- Çempionlar Liqasına vəsiqə qazanacağınız halda, komanda güclənəcək, yoxsa turnirdə elə hazırkı heyətlə mübarizə aparacaqsınız?

- Elə bu komanda ilə oynamağı düşünürük. Amma ümumi götürdükdə növbəti mövsüm üçün heyətimizi gücləndirməyi düşünürük. Hətta “Zirə”dən də transfer etmək planımızda var.

- Siz “Aznur”un qapıçısı, kapitanı, həm də rəhbərisiniz. Meydanda olmaq öz istəyinizdən irəli gəlir?

- Bəli, ən ləzzət edəni budur (gülür). Bizim komandada peşəkar futbolçular var, hansılar ki, futbol çempionatında - I, II Liqada mübarizə aparırlar. Amma mən həftədə cəmi 1 dəfə oynayıram. Mənə o ləzzət elədi ki, “Zirə” kimi komandaya qarşı oynadım.

- Və 100 dəqiqə ərzində qapınızı toxunulmaz saxladınız...

- Bəli, qapımı toxunulmaz saxladım. Bu, çox xoşdur.

- Belə çıxır ki, komandanın yaşaması üçün siz daim oynamalısınız?

- Açığı, bu, mənim hobbimdir. Kənardan baxmaq çox ağır gəlir.

- Mən də sizin kimi artıq çəkidən əziyyət çəkirəm. Amma siz artıq çəkiyə baxmayaraq, qapıda inamlı təsir bağışlayırsınız. Bunu necə bacarırsınız?

- 4 yaşımdan futbolla məşğul olmuşam. Sonra zədə aldım, bir müddət kənarda qaldım, ona görə kökəldim. Amma 15 yaşıma kimi peşəkar səviyyədə futbol oynamışam. Bu gün də həvəsim ölməyib.

- Siz şirkət rəhbərisiniz. Komandanızın bu mövsümdəki inamlı çıxışı ətrafınızda olan iş adamlarının da minifutbola maraq göstərmələrinə səbəb ola bilər?

- Ola bilər. Amma cari mövsümdə də çempionatdakı iştirakçılardan beşi mənim dostlarımın komandasıdır.

- Böyük futbolda komanda yaratmaq istəmirsiniz?

- Xeyr. Oynaya bilsəydim, bəlkə olardı (gülür).

İbrahim CƏFƏROV