“Sumqayıt” FK və “Məmmədyarovlar”ın birgə layihəsi akademiya üzvləri arasında şahmat turniri

“Sumqayıt” Futbol Klubu və “Məmmədyarovlar” Şahmat Məktəbinin birgə təşkilatçılığı ilə “Kapital Bank Arena”da “Sumqayıt”ın akademiyasının məşqçi və futbolçu heyəti arasında (U-10-dan U-19-dək) şahmat turniri keçirilib. 

Futbolxeber.az saytının klubu feysbuk səhifəsinə istinadən verdiyi məlumata görə, növbəti aylar ərzində ənənəvi olaraq keçirilməsi planlaşdırılan ilk yarış günündə akademiyanın 18 üzvü iştirak edib. 

Turnirin keçirilməsində əsas məqsəd, futbolla şahmatın vəhdətini təşkil etməklə yanaşı, gənc futbolçuların taktiki düşüncələrini inkişaf etdirməyə zəmin yaratmaqdır. Yarışı “Sumqayıt” FK-nın prezidenti Riad Rəfiyev, əsas komandanın baş məşqçisi Samir Abasov da izləyib.

Yekunda “Məmmədyarovlar” Şahmat Məktəbinin rəhbəri, şahmat üzrə beynəlxalq dərəcəli qrossmeyster Zeynəb Məmmədyarovaya klubun idman geyimi təqdim edilib.

Qeyd edək ki, “Sumqayıt” FK ilə “Məmmədyarovlar” Şahmat Məktəbi arasında əməkdaşlığa əsasən, həftənin müəyyən günlərində akademiyanın gənc futbolçularına xüsusi olaraq şahmat dərsləri keçiriləcək.