Hafiz Məmmədov 54 yaşında

Bu gün “Bakı” Futbol Klubunun prezidenti Hafiz Məmmədovun ad günüdür.

Futbolxeber.az saytının məlumatına görə, Hafiz Məmmədovun 54 yaşı tamam olur.

O, 2004-cü ildən etibarən “Bakı” klubunun prezidentidir. Hafiz Məmmədovun rəhbərliyi altında komanda 2 dəfə ölkə çempionu olub, 3 dəfə kuboka sahib çıxıb, həmçinin Avroliqanın play-off mərhələsinə yüksələn ilk Azərbaycan klubu kimi tarixə düşüb.

Hafiz Məmmədov 8 böyük futbol meydançası olan və 300 uşağın təlim aldığı futbol akademiyasından ibarət möhtəşəm bir futbol bazasını Azərbaycan futboluna təqdim edib. Hal-hazırda bu akademiyanın məzunlarından 40-ı Azərbaycanın müxtəlif yaş qrupları üzrə milli komandalarında forma geyir. “Bakı”nın yetirmələrinə Premyer Liqa və I divizionun əksər klublarında rast gəlmək mümkündür.

Hafiz Məmmədov uğurlu iş adamı olması ilə bərabər, Azərbaycanın dünyada təbliği yönündə də böyük işlər görüb. İspaniyanın "Atletiko" və Fransanın "Lans" klubları ilə əməkdaşlıq sayəsində hər iki Avropa ölkəsində, eləcə də bütün dünyada  ölkəmizi yüz minlərlə insanlar tanıyıb. Hər iki klubun oyun formasında "Azerbaijan - Land of fire" loqotipi görüntülənib.

Biz də Hafiz bəyi doğum günü münasibəti ilə təbrik edir, ona uzun ömür, can sağlığı və işlərində müvəffəqiyyətlər arzu edirik.

Ad gününüz mübarək, Hafiz bəy!