Vitali Borisov: “Azı 9 xal toplaya bilərdik”

“Oyuna yaxşı başladıq, qol vurmaq üçün epizodlarımız da rəqibdən çox oldu. Niderland millisi 5-6 şansdan 3-nü dəyərləndirdi, bizim zərbələrimiz isə qapı dirəyindən qayıtdı".

Futbolxeber.az saytının məlumatına görə, bu sözləri futzal üzrə Azərbaycan millisinin baş məşqçisi Vitali Borisov DÇ-2024-ün elit-raund mərhələsi çərçivəsində Niderlanda 0:3 hesabı ilə uduzduqları oyundan sonra deyib.

Yenilgiyə baxmayaraq, o, komandasına təşəkkür edib: "Nəticə qane etməsə də, mübarizəyə görə komandama təşəkkür edirəm. Sona qədər vəziyyəti düzəlmək üçün əllərindən gələni etdilər, çalışdılar, amma alınmadı".

Mütəxəssisin sözlərinə görə, qrup mərhələsini 4 xalla başa vursalar da, bu, komandanın real gücünə uyğun nəticə deyil: "Azı 9 xal toplaya bilərdik. Oyunlar oldu ki, hesabda 2 top fərqi ilə önə keçdik, lakin üstünlüyümüzü qoruya bilmədik. Bəzi matçlara isə tam heyətlə çıxa bilmədik, kimisi zədə, kimisi də cəza üzündən komandaya kömək edə bilmədi. Gələcək oyunlar üçün heyətə yeni oyunçular dəvət edəcəyik. Çox işləməliyik. Demək olar, yeni komanda qururuq”.