Zaur Axundov: “Araz Naxçıvan” Avropada heç vaxt bu qədər zəif mövqedə olmayıb”

Azərbaycan Futzal Federasiyasının prezidenti Zaur Axundovun Futbolxeber.az saytına müsahibəsi

- Bu gün (söhbət dünən olub - red.) keçirilən “Neftçi” İK - “Araz Naxçıvan” oyunu (1:4) ilə Yüksək Liqada 2022/23 mövsümünə yekun vuruldu. Cari mövsümü necə dəyərləndirirsiz?

- Əvvəlki illərdə olduğu kimi, cari mövsüm də maraqlı idman mübarizəsi şəraitində keçdi. Düzdü, bəzi oyunlarda hesab arasındakı fərqlər böyük olurdu. Bu məqam bizi bir qədər narahat edir. Çünki istəmirik ki, çempionatın iştirakçıları arasında səviyyə fərqi yüksək olsun. Ümumi götürdükdə çempionat normal qaydada keçdi. Lakin bununla kifayətlənmək olmaz. Çalışmalıyıq ki, növbəti mövsüm çempionatın da, klublarn da səviyyəsi yüksəlsin. Çünki rəqabət olmayan yerdə inkişafdan söhbət gedə bilməz.

- Yəqin ki, “Araz Naxçıvan”ın bundan sonrakı hədəfi avrokuboklarda uğur qazanmaqdı...

- Bəli, Avropada da uğur qazanmaq lazımdı. Bunun üçün ilk növbədə heyət güclənməlidi. Düşünürəm ki, bu yolda lazımi addımlar atılacaq. “Araz Naxçıvan” tarixi ərzində Avropada heç vaxt bu qədər zəif mövqedə olmayıb. Ona görə də tezliklə vəziyyəti dəyişmək lazımdı. “Araz Naxçıvan” mütləq Avropadakı ad-sanını geri qaytarmalıdı. Bilirsiz ki, komanda 2 dəfə “Dördlər finalı”nda mübarizə aparıb. Yenidən ən yüksək hədəflər uğrunda mübarizə aparmaq lazımdı.

- Ötən söhbətimizdə futbolda olduğu kimi, futzalda da klublara maliyyə yardımı ayrılmasının müzakirəyə çıxarılacağını bildirmişdiz. Bu məsələ ilə bağlı hər hansı yenilik var?

- Bəli, bu məsələ diqqətimizdədi. AFFA rəhbərliyi ilə də, baş katib Sərxan Hacıyevlə də müzakirələrimiz davam edir. AFFA İcraiyyə Komitəsinin qarşıdakı iclasının gündəliyinə bu məsələ də daxil ediləcək. Ümidvaram ki, məsələ müsbət həll olunacaq.

- Maliyyə yardımı ayrılacağı halda, bölgə təmsilçilərinə üstünlük veriləcəyini söyləmişdiz. Artıq yol xəritəsi cızılıb?

- Bəli, bununla bağlı planlarımız hazırdı. Ancaq yenə də AFFA İcraiyyə Komitəsinin yekun qərarını gözləyirik.  

İbrahim CƏFƏROV