Beş illik seriyaya son qoymaq ümidi ilə…

UEFA Çempionlar Liqasının əsas mərhələsində mübarizəyə başlayacaq “Araz-Naxçıvan”ın qarşısına növbəti mərhələyə vəsiqə qazanmaq tapşırığı qoyulub.

Futbolxeber.az-ın Azərbaycan Futzal Federasiyasının saytına istinadən verdiyi məlumata görə, təmsilçimiz bu yolda oktyabrın 26-da, 27-də və 29-da ardıcıl olaraq “Orebro” (İsveç), “Loznika Qrad” (Serbiya) və Mostar (Bosniya və Herseqovina) klubları ilə üz-üzə gələcək. 5-ci qrupdan ancaq birinci pillənin sahibi olan komanda elit-raunda yüksələcək.

İndiyə qədər 13 dəfə əsas mərhələdə iştirak edən təmsilçimiz 9 dəfə elit-raunda yüksəlməyi bacarıb. İlk dəfə 2006/07-ci il mövsümündə bu tapşırığın öhdəsindən gələn “Araz-Naxçıvan” 2016/17-ci il mövsümündən sonra elit-raundda oynamayıb. Baş məşqçi Miltinyonun rəhbərliyi altında Makedoniyada keçirilmiş əsas mərhələ matçlarında maksimum xal toplayan komandamız elit-raundda uğursuz çıxış etmişdi.

Ümumilikdə isə “Araz-Naxçıvan” qitənin ən nüfuzlu klub turnirində 2 dəfə “Dördlər Finalı”nda iştirak edib və hər ikisində bürünc medal qazanıb.