“Şəfa” cəzadan yayındı, AFFA 5 min manat itirdi

Bu günlərdə AFFA İntizam Komitəsinin növbəti iclası keçirilib. Toplantıda Azərbaycan Premyer Liqasının dördüncü turunda baş verən qayda pozuntularına hüquqi qiymət verilib. İntizam Komitəsinin qərarlarına əsasən 4 klub – “Kəpəz”, “Şamaxı”, “Turan Tovuz” və “Sumqayıt” cəzalanıb. Diqqətçəkən məqam “Şəfa”nın cərimədən yayınmasıdır. Çünki adı paytaxtın, dadı Sumqayıtın olan klubun azarkeşləri “Neftçi” ilə görüşdə hakimləri təhqir etmişdilər. Belə ki, matçın ikinci hissəsində Əliyar Ağayevin “Şəfa”nın qapısına penalti təyin etməsi azarkeşlərin narazılığına səbəb olmuşdu. Fanatlar “Azərbaycan hakimi, futbolun qatili” şüarını səsləndirmişdilər. Bu isə birbaşa təhqirdir. Hakimlərin təhqir olunması ilə bağlı nizamnamədə bənd var. Orada aydın şəkildə qeyd olunub ki, bu hal ilk dəfə yaşanırsa, həmin klub 5 min manat cərimə olunur. Növbəti hallarda isə cərimənin məbləği artır.

Ötən mövsüm əksər klublar hakimlərin təhqir olunmasına görə xeyli cərimə ödəmişdilər. Xüsusən də bu baxımdan “Neftçi” seçilirdi. Görəsən, bu mövsüm qaydalar dəyişib?

Kiçik bir araşdırma apardıq və məlum oldu ki, qaydalarda hər hansı dəyişiklik yoxdur. Belədə “Şəfa”nın cəzadan yayınması maraq doğurur. Böyük ehtimalla, matçın AFFA nümayəndəsi bu məqamı protokolda qeyd etməyib. Bu səbəbdən də “Şəfa” 5 min manatlıq cərimədən yayınıb. Lakin xəbərçilik kimi çıxmasın, İntizam Komitəsi həmin 5 mini “diriltmək” istəyirsə, komitə üzvləri növbəti iclasda bu məsələyə yenidən baxa bilərlər. Videoyazıda 80-ci dəqiqədən sonraya qulaq yetirsələr, “Azərbaycan hakimi, futbolun qatili” şüarını eşidəcəklər.

Bax, sonra da bəziləri deyir ki, biz AFFA-nı istəmirik. Biz assosiasiyanı istəməsəydik, qurumun 60 milyonluq büdcəsinin üzərinə 5 min də gəlinməsinə çalışmazdıq. Ola bilər, 60 milyonun qarşısında 5 min kiçik rəqəmdir. Amma atalar əbəs yerə deməyiblər ki, dama-dama göl olar.

İBRAHİM