Dambrauskas Sadıqovu çətin rəqib saymır? - QEYD

“Liqada hazırda 3 elit məşqçi işləyir ki, onların gördüyü iş Avropada hər kəsə bəllidir. Bu sırada olan Kurban Berdıyev və Yuri Vernidubun komandaları “Real” və “Barselona” kimi klublara qalib gəlib. Həmçinin Qurban Qurbanovun işini xüsusi vurğulamalıyam... Mən Saşa İliçi də qeyd etmək istərdim. İliç Balkan ölkələrində çox məşhur bir məşqçidir. Özünəməxsus bir tərzi var. Milli komandamızın baş məşqçisi Ayxan Abbasov da çox yaxşı məşqçidir. Andrey Demçenko da çox yaxşı mütəxəssisdir. Bu mütəxəssislərə, komandalara qarşı mübarizə aparmaq çox çətin idi...”

Bu sözləri bir neçə gün əvvəl İTV-də yayımlanan “Bol idman” verilişinə müsahibəsində “Sabah”ın baş məşqçisi Valdas Dambrauskas deyib.

Litvalı mütəxəssisin fikirləri ilə hamı razılaşar. Adıçəkilən məşqçilərin səviyyəsinə heç kimin şübhəsi yoxdur. Sadəcə müsahibədə anlaşılmayan bir məqam var. Bu da Dambrauskasın “Zirə”nin baş məşqçisi Rəşad Sadıqovun adını çəkməməsidir. Heç kim inciməsin, amma Qurbanovu, Berdıyevi, Vernidubu başa düşdük. Bəs Dimçenko və Abbasov? Rəşad Sadıqovun həqiqətənmi bu iki mütəxəssis qədər çətin rəqib deyil? Hətta çətin, yaxud asan rəqib olmaq bir yana, ən azından Rəşad Sadıqovun adı bu məşqçilərlə bir sırada çəkilməyə layiqdir. Kimsə Sadıqovu məşqçi kimi bəyənməyə bilər. Lakin unutmayaq ki, məşqçinin yerinə nəticələri danışır. Rəşad Sadıqov da “Zirə”yə rəhbərlik etdiyi müddətdə komanda 2 dəfə ölkə çempionatında gümüş, 1 dəfə isə bürünc medal qazanıb. Avrokuboklarda pley-off mərhələsinə qədər irəliləyib. Eləcə də 3 dəfə ölkə kubokunda final oynayıb. Bəli, finallarda qələbə qazana bilməyib. Amma finala çıxmağın özü də bir nəticə deyil?

Dambrauskasın Sadıqovun hansı məntiqlə adını çəkməməsi anlaşılmazdır. Ən azından məşqçi etikası deyilən bir şey var. Finalda 70 dəqiqə hesabda geridə olduğun rəqibi, həmin rəqibin baş məşqçisini necə görməzdən gələ bilərsən? Görünür, Dambrauskasın əcnəbi sevgisi bu açıqlamada obyektivliyini itirməsinə gətirib çıxarıb. Hər halda Qurban Qurbanovun adını çəkməyə bilməzdi. Ayxan Abbasov da millinin baş məşqçisi kimi yada düşüb. Yoxsa ki, dərinə getsək, Elmar Baxşıyev, Azər Bağırov kimi məşqçilər də ən yaxşılar arasında qeyd olunmalıdır.

Bəli, bu mövsüm “Zirə” ideal futbol sərgiləmədi. Komandanın xeyrinə hakim səhvləri oldu. Bütün bunları heç kim danmır. Amma insaf da dinin yarısıdır axı. Hətta Rəşad Sadıqov özü də “Turan Tovuz” və “Neftçi” ilə oyunlardan sonra komandasının lehinə hakim səhvi olduğunu etiraf etdi. Halbuki son zamanlar hansısa məşqçinin belə etirafı yada düşmür. Yeri gəlsə, istər “Neftçi” ilə oyunlarda, istər “Turan Tovuz”la matçlarda hakim səhvlərini ən çox qabardanlardan biri biz olmuşuq. Amma bütün bunları təkcə Rəşad Sadıqova bağlamaq nə dərəcədə düzgündür? Əgər hakimlər “Zirə”ni Avropaya “dartırdılarsa”, komanda niyə qitə kuboklarına vəsiqə qazanmadı?

Müasir futbolda pul çox böyük önəm daşıyır. Azərbaycan Premyer Liqasında legioner limitinin ləğvindən sonra isə maddiyyat daha çox önə çıxıb. Loru dildə desək, kimin pulu çoxdursa, o da sözün hər iki mənasında meydan sulayır. Dambrauskas da yağ-balın içində əla nəticələr qazanır. Bunu heç kim inkar etmir. Amma gün gələr vəziyyət dəyişər, onda kimin necə məşqçi olduğunu daha aydın görərik...

İBRAHİM