Beskorovaynıy: “Ukrayna ilə müqayisədə Azərbaycan çempionatında intensivlik aşağıdır”

“Çox şadam ki, qələbə qazandıq. Xüsusən də qapımızda qol görmədən qalib gəlməyimiz sevindiricidir. Məqsədimiz hər matçda 3 xal qazanmaqdır. Hər qələbə bizim üçün vacibdir. Klub rəhbərliyi və baş məşqçi bizdən avrokuboklar uğrunda mübarizə aparmağımızı istəyir. Ona görə də bütün qarşılaşmalarda maksimum nəticə göstərmək istəyirik”.

Futbolxeber.az saytına müsahibəsində bu sözləri “Sumqayıt”ın yeni transferi Danilo Beskorovaynıy Azərbaycan Premyer Liqasının 18-ci turunda səfərdə “Karvan-Yevlax”a 2:0 hesabı ilə qalib gəldikləri oyun barədə danışarkən deyib.

O, “Sumqayıt”ın heyətində debütunu belə qiymətləndirib: “Komandam mənim debüt matçında qələbə qazandığı üçün sevinirəm. Lakin daha da inkişaf etməliyik. Rəqib çox epizod yaratdı. Biz isə müdafiədə daha inamlı oynamaq istəyirik”.

Ukraynalı müdafiəçi ölkəmizə gəlişindən də söz açıb: “Təklif gəldi. Bilirsiniz ki, Emil Mustafayevlə Ukraynada bir komandada oynamışıq. O, mənə “Sumqayıt” haqda məlumat verdi. Mən də təklifi qəbul etdim. İstəyirəm ki, daha çox oyun praktikası qazanım və “Sumqayıt”a kömək olum”.

Beskorovaynıy Azərbaycan futbolu haqda məlumatlı olduğunu söyləyib: “Təbii ki, futbolunuz haqda məlumatım var idi. Dostum Kaşuk “Qarabağ”da oynayır. Onunla birgə millidə çıxış etmişik”.

26 yaşlı futbolçu Azərbaycan və Ukrayna çempionatlarını belə müqayisə edib: “Açığı, ciddi fərq yoxdu. Əsas məqam intensivliklə bağlıdır. Mən də buna öyrəşməyə çalışıram. Açığı, Azərbaycan çempionatında intensivlik bir qədər aşağıdır. Burada daha çox güc futboluna üstünlük verilir. Əksər komandalar uzun ötürmələrlə çıxış edirlər. Mən də buna öyrəşməliyəm”.

O, “Sumqayıt”ın avrokubok şansını da dəyərləndirib: “Məqsədimiz hər matçda qələbədir. Həm çempionatda, həm də kubokda sona qədər mübarizə aparacağıq. Konkret proqnoz vermək çətindir. Mövsümün sonunda biləcəyik. Lakin “Sumqayıt”ın avrokuboklara vəsiqə qazanması realdır”.

Fərəc Aslanov