Qurban Qurbanov: “Emosiyalara qapılıb etirazımı bir az sərt formada bildirdim”

"Vacib bir qələbə qazandıq. Möhkəm bir komandaya qarşı oynayırdıq. Oyunçularım xarakter göstərdilər. Belə qarşılaşmalarda oyunu ələ almaq elə də asan deyil. Hər bir pauza, hər bir cərimə zərbəsi rəqibin üstünlüyü demək idi. Hər bir halda futbolçularım qalib gəlmək üçün əllərindən gələni etdilər".

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan Premyer Liqasının 18-ci turunda “Turan Tovuz”a 1:0 hesabı ilə qalib gəldikləri oyundan sonra deyib.

Mütəxəssis Liverpul səfərindən sonra yorğunluq olmasına baxmayaraq, əsas heyətə güvənməsini çempionatdakı rəqabətlə əlaqələndirib. O, zədə qorxusu olduğunu, lakin oyunçuların xarakter göstərərək qalib gəldiyini vurğulayıb.

Qurban Qurbanov hakim Elçin Məsimovla bağlı iradlarına da aydınlıq gətirib. O, oyunun tez-tez dayanmasının ritmi pozduğunu, lakin fasilədə hakimlə danışaraq anlaşdıqlarını qeyd edib:

"Hakimlərə nəsə tövsiyə etməyə ehtiyac yoxdur, sadəcə uğurlar arzulayıram. Oyun çox tez-tez dayanırdı. Elçin Məsimovun idarə etdiyi matçlarda adətən özümü daha rahat hiss edirəm. Avropa təcrübəsi böyükdür və bu da məndə əlavə güvən yaradır. Matç zamanı müəyyən emosiyalara qapılıb etirazımı bir az sərt formada bildirdim. Fasilədə onunla danışdım və etirazımın nədən qaynaqlandığını izah etdim. Normal qarşıladı. Oyun tez-tez dayandıqda futbolçuların ritmi də pozulur. Amma bütün bunları ən yaxşı onlar bilirlər".

Ağdam klubunun çalışdırıcısı İbrahima Vadji ilə bağlı epizodda qırmızı vərəqə verilməməsini doğru qərar sayıb, vurulan qolda isə ofsayd olmadığını öz kameraları vasitəsilə dəqiqləşdirdiklərini bildirib.

Q.Qurbanov Çempionlar Liqasındakı uğurları münasibətilə bəzi yerli klubların təbrik paylaşımı etməməsinə və "Sabah"ın çempionluq yarışındakı yüksəlişinə münasibət bildirib:

"İnanın ki, kimin təbrik edib-etməməsi ilə dərindən maraqlanmamışam. Dünya praktikasında bu cür hallar var, rəqabət olan yerdə bunu normal qarşılayıram. "Sabah"ın yüksəlişi təbii ki, bizi bir komanda olaraq narahat edir. Amma digər tərəfdən sevindirir ki, bu rəqabət bizi də irəliyə doğru aparır".

Sonda təcrübəli mütəxəssis qarşıdan gələn vacib oyunlar və meydança amili barədə narahatlığını dilə gətirib:

"Çox narahatam. "Nyukasl"la matçdan əvvəl iki Şamaxı səfərimiz var. "İmişli" ilə matçda da Qubadakı meydançanın vəziyyəti bizi narahat edir. Müəyyən rotasiyalar olacaq, amma futbolçuların oyun təcrübəsinə də ehtiyac var".