“Araz-Naxçıvan”da ciddi itkilər: ikisi zədəli, biri müəmmalı

Azərbaycan Premyer Liqasının 17-ci turu çərçivəsində Qubada “İmişli”nin qonağı olacaq “Araz-Naxçıvan” meydana ciddi itkilərlə çıxacaq.

Futbolxeber.az saytının məlumatına görə, Naxçıvan klubunun 3 aparıcı futbolçusu bu matçda meydana çıxmayacaq. Söhbət Felipe Santos, İssuf Paro və Rahil Məmmədovdan gedir. Adıçəkilən 3 futbolçunun adı “İmişli” ilə görüşün iştirak ərizəsində yoxdur.

Müdafiəçilər – Rahil və İssuf zədəlidirlər və bu səbəbdən komandanın qış fasiləsində keçirdiyi yoxlama oyunlarında da forma geyməyiblər. Santosun isə bugünkü görüşdə hansı səbəbdən meydana çıxmaması məlum deyil. Çünki braziliyalı futbolçu “Zaqatala”ya qarşı keçirilən son yoxlama görüşündə (4:0) ikinci hissədə meydanda olmuşdu.