”Xəzər Lənkəran” ”Turan”la oyunun hazırlığına start verdi

Dünən Bakıdan Lənkərana yola düşən "Xəzər Lənkəran" bazasında qısa müddətli istirahətdən sonra axşam saatlarında “Kəpəz”lə keçirilən matçın bərpa məşqini keçirdi. Futbolxeber.az-ın məlumatına görə, bu gün “Xəzər Lənkəran” Con Bencamin Toşakın rəhbərliyi altında Topaz Premyer Liqasının 26-cı turu çərçivəsində baş tutacaq “Turan”la səfər oyununun hazırlığına start verdi. Səhər məşqi Lənkəran Olimpiya Kompleksinin meydançasında baş tutdu və futbolçular 1 saat 10 dəqiqə davam edən məşqdə məşqçilər korpusunun tapşırıqlarına əsasən müxtəlif taktiki çalışmaları yerinə yetirdilər. Bu gün daxil olmaqla komanda sabah da gün ərzində iki məşq keçirərək aprel ayının 11-də səhər məşqindən sonra Bakı şəhərinə yola düşəcək. Hazırda komandanın heyətində zədəli futbolçu yoxdur və futbolçular daha bir səfər qələbəsi qazanmaq istəyi ilə məşqlərdə səylə çalışırlar.